Միացեալ Նահանգներ-Իրան փոխադարձ յարձակումներ

Միացեալ Նահանգներու նախագահ Տանըլտ Թրամփ յայտարարեց. «Իրան իսկապէս կ՛ուզէ համաձայնութիւն կնքել, եւ անիկա Միացեալ Նահանգներուն եւ մեր կողքին կանգնողներուն համար լաւ համաձայնութիւն մը պիտի ըլլայ»:

«Դեմոկրատականները եւ շարք մը հանրապետականներ, որոնք կը թուի, թէ հայրենասէրներ չեն, արդեօք չե՞ն անդրադառնար, թէ ինծի համար շատ դժուար կ՛ըլլայ աշխատանքս ճիշդ ձեւով կատարել ու բանակցիլ, երբ քաղաքական վարձկանները կը շարունակեն աննախադէպ մակարդակներով ժխտական շատախօսութիւն կատարել` ըսելով, թէ պէտք է արագ կամ դանդաղ շարժիմ, պատերազմի դիմեմ կամ չդիմեմ, կամ որեւէ այլ բան: Միայն նստեցէ՛ք ու հանգստացէ՛ք, որովետեւ ինչպէս միշտ հարցերը ի վերջոյ լաւ կ՛ընթանան», նկատել տուաւ ան:

Թրամփ նախքան այդ ալ «Թրութ Սոշըլ» ընկերային ցանցին վրայ գրառում մը կատարելով յայտնեց, որ Իրանի հետ համաձայնութիւնը յստակօրէն կը նշէ, որ ան հիւլէական զէնք պիտի չունենայ:

«Իրանի հետ համաձայնութիւնը մանրակրկիտ ու լայն կերպով կը քննարկուի` անդրադառնալով հիւլէական թղթածրարին վերաբերող տարբեր երեսներուն», գրեց ան:

Սպիտակ տան ղեկավարը ընդգծեց. «Համաձայնագիրին մեծ մասը հիւլէական թղթածրարին շուրջ է»:

Միւս կողմէ, ամերիկեան բանակի կեդրոնական շրջանի հրամանատարութիւնը յայտարարեց, թէ գործած է պաշտպանողական յարձակումներ, որոնք թիրախաւորած են Իրանի Ղորոք եւ Քաշմ շրջաններուն մէջ ռատարներ, ղեկավարման եւ անօդաչու թռչող սարքերու կառավարման դիրքեր:

Հրամանատարութիւնը նշեց, որ յարձակումները գործուած են շաբաթ եւ կիրակի օր` հակադարձելով Իրանի կողմէ միջազգային ջուրերուն վերեւ թռիչք կատարող ամերիկեան անօդաչու թռչող սարքի մը վար առնուելուն` շեշտելով, որ պիտի շարունակէ «իրանեան անարդարանալի» յարձակումէն» պաշտպանել իր ներուժն ու շահերը:

Իրանի Յեղափոխական պահակագունդը իր կարգին հաղորդեց, որ իրանեան ուժերը թիրախաւորած են օդուժի այն ռազմակայանը, ուրկէ ամերիկեան բանակը յարձակում գործած է Սիրիք կղզիին վրայ:

Նախքան այդ, Քուէյթ յայտարարեց, թէ հրթիռներով ու անօդաչու թռչող սարքերով յարձակումներու դէմ դրած է:

Յեղափոխական պահակագունդը աւելցուց, որ ամերիկեան որեւէ յարձակումի կրկնութեան պարագային իրանեան հակադարձութիւնը «ամբողջովին տարբեր պիտի ըլլայ»:

Իրանի խորհրդարանի նախագահ Մոհամետ Պաքեր Քալիպաֆ յայտնեց, որ Իրանի ծովային շրջափակումն ու Լիբանանի մէջ պատերազմական ոճիրներու մագլցումը Միացեալ Նահանգներու զինադադարը չյարգելուն կտրուկ փաստ է:

«Ամէն ընտրանք իր գինը ունի, եւ վճարումի ժամանակը անպայման պիտի գայ: Ի վերջոյ, բոլոր հարցերը պիտի յստականան եւ իրենց տեղը գտնեն», նշեց Քալիպաֆ:

Աղբիւրը` Ազդակ