Թալեպան շարժումը կը յայտնէ, թէ Աֆղանիստանի մէջ Փաքիստանեան հարուածներուն պատճառով 13 զոհ արձանագրուած է

Աֆղանիստանի երեք շրջաններու վրայ Փաքիստանի հարուածներէն ետք արձանագրուած են 13 զոհեր, որոնց շարքին` 11 մանուկներ: «Ռոյթըրզ» լրատու գործակալութեան համաձայն, յայտարարած է Աֆղանիստանի մէջ իշխող Թալեպան շարժումի բանբերը:

Զապիհուլլա Մուժահիտիի համաձայն, խաղաղ բնակիչներու տուներու ռմբակոծման պատճառով վիրաւորուած է 14 կին:

Փաքիստանէն մեկնաբանութիւն տակաւին չկայ, սակայն ապահովական պաշտօնատարները «Ռոյթըրզ»-ին յայտնած են, որ Իսլամապատը օդային հարուածներ հասցուցած է այն վայրերուն, որոնք, ըստ անոնց, «փաքիստանցի զինեալներու թաքստոցներ են եւ այլ կառոյցներ, որոնք կ՛օգտագործուին Փաքիստանի դէմ»:

Իսլամապատը Քապուլին շարունակաբար մեղադրած է Փաքիստանի մէջ յարձակումներ ծրագրող զինեալներուն ապաստան տալու յանցանքով: Թալեպան շարժումը հերքած է մեղադրանքները` իր կարգին յայտարարելով, որ Փաքիստանի մէջ զինեալներու գործունէութիւնը այդ երկրի ներքին խնդիրն է:

Նախկին դաշնակիցները փետրուարին արիւնալի բախումներ ունեցած էին: Մարտին փխրուն զինադադար հաստատուեցաւ, իսկ հակամարտութեան կարգաւորման համար միջնորդական ջանքեր կը գործադրէ Չինաստան:

Աղբիւրը՝ Ազդակ