Եւրոպական Յանձնաժողովի Նախագահը ողջունեց Հայաստանի հետ գործակցութեան սերտացումը չորս հիմնական ուղղութիւններով
Երեւանի մէջ 5 Մայիսին տեղի ունեցած Հայաստան–Եւրոպական Միութիւն վեհաժողովին ընթացքին Ուրսուլա Ֆոն Տեր Լէյեն շեշտեց Հայաստանի հետ համագործակցութեան սերտացման կարեւորութիւնը։ Ան ներկայացուց համագործակցութեան չորս հիմնական ուղղութիւններ։
Առաջինը՝ կապուածութիւնն է, ներառեալ փոխադրական ցանցերու զարգացումը, ուր Հայաստան կրնայ դառնալ կարեւոր հանգոյց «Խաղաղութեան խաչմերուկ» նախաձեռնութեան շնորհիւ։ Երկրորդը՝ ուժանիւթն է, ուր ԵՄ-ն կը սատարէ վերականգնուող ուժանիւթի եւ ելեքտրական ցանցերու զարգացման։ Երրորդը՝ թուայնացումն է, ընդգծելով Հայաստանի ներուժը արհեստական բանականութեան եւ տեխնոլոգիական ոլորտներուն մէջ։ Չորրորդը՝ տնտեսական աջակցութիւնն ու ընկերային դիմակայունութիւնն է, ներառեալ 270 միլիոն եուրոյի ծրագիր, որ նպատակ ունի խթանել ներդրումները եւ զարգացումը։
Ֆոն Տեր Լէյեն նաեւ նշեց վիզաներու ազատականացման հարցով արձանագրուած յառաջընթացը եւ շեշտեց ապատեղեկատուութեան դէմ պայքարի կարեւորութիւնը։ Միաժամանակ ան չպատասխանեց հայ գերիներու հարցին վերաբերող հարցումին։
Միւս կողմէ, Ռեչեփ Թայիփ Էրտողան քննադատեց Եւրոպական Միութիւնը՝ պնդելով, թէ առանց Թուրքիոյ լիիրաւ անդամակցութեան ԵՄ-ն չի կրնար դառնալ համաշխարհային դերակատար։
Աղբիւրը` Ասպարէզ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
