Պահրէյն- Միջկրօնական աղօթք՝ յանուն խաղաղութեան, ներդաշնակութեան եւ Թագաւորութեան բարգաւաճման

Վազգէն Աբարդեան - Վատիկան

Հաւատքի, միութեան եւ ջերմեռանդ աղօթքի բացառիկ երեկոյ մը տեղի ունեցաւ Պահրէյնի մէջ՝ «This is Bahrain» կազմակերպութեան եւ «Արաբիոյ Մատուռի Տիրամայր» տաճարին նախաձեռնութեամբ։ Համազգային այս հսկումը կը վայելէր Պահրէյնի Թագաւորութեան գահակալ՝ Նորին Վեհափառութիւն Համատ պըն Իսա Ալ Խալիֆայի բարձր հովանաւորութիւնը։

«Տարբեր աւանդոյթներ, տարբեր հաւատքներ ու մշակոյթներ. մենք այստեղ համախմբուած ենք աղօթելու այս հիանալի երկրի խաղաղութեան համար, որ մեզի հնարաւորութիւն կու տայ ազատօրէն արտայայտելու մեր հաւատքը եւ ըլլալու միասնական», իր բացման խօսքին մէջ նշեց Հիւսիսային Արաբիոյ Առաքելական Փոխանորդ, Եպիսկոպոս Ալտօ Պերարտին։

Միջազգային ներկայութիւն եւ միասնական աղօթք

Չորեքշաբթի, 8 Ապրիլի երեկոյեան տեղի ունեցած արարողութեան ներկայ էին աւելի քան 1300 հաւատացեալներ՝ տարբեր ազգութիւններէ եւ դաւանանքներէ։ Ներկայ էին նաեւ կրօնական առաջնորդներ, կառավարական պատուիրակներ եւ դիւանագիտական մարմնի ներկայացուցիչներ։ Թագաւորին անունով հանդէս եկաւ ընկերային զարգացման նախարար Օսամա Ալ Ալաուին։ Ներկայ էին նաեւ ԱՄՆ-ի, Ճափոնի եւ Փաքիստանի դեսպանները, ինչպէս նաեւ Պահրէյնի Շուրայի խորհուրդի եւ Ներկայացուցիչներու պալատի անդամներ։

Արարողութիւնը սկիզբ առաւ Սուրբ Հոգիի կանչով, որուն յաջորդեցին սաղմոսներու եւ Աւետարանի ընթերցումներ ու աղօթքներ՝ անգլերէն եւ արաբերէն լեզուներով, որոնք կը խորհրդանշէին երկրի համայնքային բազմազանութիւնը։

Խաղաղութեան եւ հանդուրժողականութեան պատգամ

Եպիսկոպոս Պերարտին իր ելոյթին մէջ ողջունեց զինադադարի հաստատումը՝ զայն որակելով որպէս յուսադրիչ քայլ դէպի վերջնական խաղաղութիւն։ Ան բարձր գնահատեց Պահրէյնի ղեկավարութեան յանձնառութիւնը՝ կրօնական ազատութեան եւ համակեցութեան արժէքներու պահպանման գործին մէջ։

«Քրիստոնեայի ամենահզօր զէնքը աղօթքն է։ Երբ մենք միասնաբար կը դիմենք Աստուծոյ, մեր աղօթքները կը բարձրանան երկինք», նշած էր Մանամայի Սուրբ Սիրտ եկեղեցւոյ հովիւ, Հայր Ֆրանսիս Փ. Ժոզեֆը։

Իտալիոյ աջակցութիւնը

Իտալիոյ դեսպան Անտրէա Քաթալանօն, Ֆիտես (Fides) գործակալութեան փոխանցած իր յայտարարութեան մէջ, շեշտեց, որ այս հանդիպումը «խորհրդածութեան եւ յոյսի պահ մըն էր՝ տարածաշրջանային լարուածութեան նուազման եւ մնայուն խաղաղութեան համար»։ Ան վերահաստատեց Իտալիոյ աջակցութիւնը Պահրէյնի Թագաւորութեան՝ մշակոյթներու եւ կրօններու միջեւ երկխօսութեան խթանման գործին մէջ։

Այս ձեռնարկը եւս մէկ անգամ փաստեց Պահրէյնի դերը որպէս հանդուրժողականութեան փարոս Մերձաւոր Արեւելքի մէջ, ուր տարբեր հաւատքներու տէր մարդիկ կրնան կողք-կողքի աղօթել յանուն ընդհանուր բարօրութեան։