Թրամփ. «Իրան կ՝ուզէ, որ Հորմուզի նեղուցը կարելի եղածին չափ շուտ բանանք»

Միացեալ Նահանգներու նախագահ Տանըլտ Թրամփ նշեց. «Իրան քիչ առաջ մեզի յայտնեց, որ փլուզման կացութեան մէջ է»:

«Մեզմէ կարելի եղածին չափ շուտ Հորմուզի նեղուցի բացումը կ՛ուզեն, մինչ այդ կը փորձեն իրենց ղեկավարութեան կացութիւնը կարգաւորել. բան մը, որ կը հաւատամ, որ պիտի կարենան իրագործել», աւելցուց Սպիտակ տան ղեկավարը:

Ամերիկացի պաշտօնատարներ «Ուոլ Սթրիթ Ճըռնըլ»-ին նշած են. «Միացեալ Նահանգներու նախագահ Տանըլտ Թրամփն ու անոր ազգային անվտանգութեան խումբը կասկածով կը դիտեն իրանեան առաջարկը»:

«Թրամփ Իրանի առաջարկը կտրուկ կերպով չմերժեց, սակայն կասկած յայտնեց, որ ան բարի կամեցողութեամբ կը գործէ», օրաթերթին յայտնած են պաշտօնատարները:

Անոնք նաեւ ըսած են. «Թրամփ նաեւ կասկած յայտնեց, որ Իրան պատրաստ է իւրանիոմի հարստացման վերջ տալու իր պահանջին ընդառաջելու»:

«Իրանի հետ բանակցութիւնը պիտի շարունակենք, եւ հաւանական է, որ յառաջիկայ օրերուն մեր պատասխանն ու փոխադարձ առաջարկները ներկայացնենք», նշած են ամերիկացի պաշտօնատարները:

Ամերիկացի պաշտօնատար մը «Ռոյթըրզ» լրատու գործակալութեան յայտնեց. «Միացեալ Նահանգներու նախագահ Տանըլտ Թրամփ Իրանի վերջին առաջարկէն գոհ չէ, որովհետեւ անիկա Թեհրանի հիւլէական ծրագիրին չ՛անդրադառնար»:

Փաքիստանցի պաշտօնատար մը «Ուաշինկթըն Փոսթ» օրաթերթին ըսած է, թէ Թեհրան Ուաշինկթընէն խնդրած է Հորմուզի նեղուցը վերաբանալուն դիմաց իր նաւահանգիստներու շրջափակումը վերցնել:

Միացեալ Նահանգներու արտաքին գործոց նախարար Մարքօ Ռուպիօ ամերիկեան «Ֆոքս Նիուզ» պատկերասփիւռի կայանին յայտնեց. «Կը կարծեմ, որ իրանցիները իրենք զիրենք իրենց դիմագրաւած նեղ կացութենէն դուրս բերելու նկատմամբ լուրջ են: Այս հակամարտութեան սկիզբէն առաջ անոնց ունեցած բոլոր խնդիրները ոչ միայն կը յամենան, այլեւ թերեւս աւելի վատ են, սակայն անոնք այժմ հրթիռներուն կէսը ունին, եւ որեւէ գործարան չունին, ո՛չ ալ ծովուժ»:

«Իրանի մէջ բոլորը ծայրայեղական են, սակայն կան ոմանք, որոնք կը գիտակցին, թէ պէտք է երկիրն ու տնտեսութիւնը ղեկավարեն, եւ կան ոմանք, որոնք ամբողջական կերպով աստուածաբանութեան հիմամբ կը գործեն: Կրօնական նկատառումներով գործող ծայրայեղականները միայն Յեղափոխական պահակագունդի պաշտօնատարները չեն, այլ նաեւ գերագոյն հոգեւոր պետն ու անոր խորհուրդը», ըսաւ ան:

«Հորմուզի նեղուցը համազօր է տնտեսական հիւլէական զէնքի, զոր Իրան կը ջանայ աշխարհի դէմ օգտագործել: Անոնք կը պարծենան աշխարհը ուժանիւթի պատանդ բռնելով: Երեւակայեցէք, եթէ նոյն այդ անձերը կարենան հիւլէական զէնք ձեռք ձգել», յայտնեց Ռուպիօ:

«Հակառակ ծայրայեղական ըլլալնուն, իրանեան վարչակազմին մէջ կան անձեր, որոնք որեւէ որոշումի ետին կանգնող գինն ու շահը կը կշռեն: Այդ պատճառով ալ շրջափակում հաստատեցինք: Պէտք է ապահովենք, որ իւրաքանչիւր չար արարքի գինը անոնց կատարածի շահէն գերազանց ըլլայ», ըսաւ ան:

Միացեալ Նահանգներու արտաքին գործոց նախարարը նաեւ յայտնեց. «Կը յուսամ, որ այս հակամարտութենէն ետք ամբողջ աշխարհը գիտակցած ըլլայ Իրանի ներկայացուցած վտանգին: Իրանի հիւլէական զէնքի կիրարկումով ընել ուզածը ճիշդ այն է, ինչ որ հիմա կ՛ընեն քարիւղով»:

«Մեր նպատակը իրանցի ժողովուրդին վնաս հասցնելը չէ: Անկեղծօրէն, կը մաղթենք, որ իրանցի ժողովուրդին ձայնը լսուի, փոխան անոնցմէ 40 հազարը փողոցներուն ու հիւանդանոցներուն մէջ սպաննուի եւ կանոնաւոր կերպով մահապատիժի ենթարկուին: Անոնք այդ վարչակարգին զոհերն են», ըսաւ Ռուպիօ:

Աղբիւրը՝ Ազդակ