«Եունիսէֆ. Միջին Արեւելքի մէջ օրական 87 մանուկ կը սպաննուի կամ կը վիրաւորուի»

Վազգէն Աբարդեան - Վատիկան

Միջին Արեւելքի մէջ տիրող տագնապալի իրավիճակը կը հասնի իր գագաթնակէտին, ուր ամբողջ սերունդ մը կանգնած է անդունդի եզրին: Ըստ Եիւնիսէֆի (UNICEF) վերջին տուեալներուն, հակամարտութեան սրացումէն ի վեր օրական միջին հաշուով 87 մանուկ կը սպաննուի կամ կը վիրաւորուի՝ ընդհանուր թիւը անցնելով 2,100-ը:

Մահուան եւ տեղահանման թիւեր

Եունիսէֆի փոխ-տնօրէն Թետ Շայպան, ՄԱԿ-ի կեդրոնատեղիին մէջ տուած իր զեկոյցին ընթացքին, ներկայացուց վիճակագրական ցաւալի պատկեր մը: Զոհերուն շարքին են 206 մանուկներ Իրանի մէջ եւ 118՝ Լիբանան: Յաւելեալ զոհեր արձանագրուած են նաեւ Իսրայէլի եւ Քուէյթի մէջ:

Սակայն կորուստները միայն մարդկային չեն. տեղահանութեան ալիքը հսկայական չափերու հասած է: Միայն Իրանի մէջ 3.2 միլիոն մարդ լքած է իր տունը, իսկ Լիբանանի մէջ տեղահանուածներուն թիւը կը գերազանցէ 1 միլիոնը, որոնցմէ շուրջ 370,000-ը մանուկներ են:

Լիբանան. Կրթութեան եւ առողջապահութեան փլուզում

Լիբանանի մէջ իրավիճակը յատկապէս օրհասական է։ Աւելի քան 350 հանրային վարժարաններ այսօր կը ծառայեն որպէս պատսպարաններ, ինչ որ պատճառ դարձած է շուրջ 100,000 աշակերտներուն կրթութեան ընդհատման։ Շայպան, որ նոր վերադարձած է Լիբանանէն, ականատես եղած է հիւանդանոցներու եւ ջրամատակարաման համակարգերու քայքայման, որոնք արդէն իսկ տկարացած էին նախորդ տարիներուն տնտեսական տագնապին պատճառով։

«Այս թիւերուն ետին կան ծնողներ, ուսուցիչներ եւ քոյր-եղբայրներ: Ամբողջ ազգեր ցնցումի մէջ են,» նշած է Շայպանը:

Մարդասիրական օգնութեան հրատապութիւնը

Չնայած Եունիսէֆի կողմէ տարուող աշխատանքներուն՝ սննդամթերքի, դեղորայքի եւ մաքուր ջուրի մատակարարման ուղղութեամբ, կարիքները շատ աւելի արագ կ'աճին, քան առկայ միջոցները: ՄԱԿ-ը յայտարարած է 308 միլիոն տոլարի հրատապ օգնութեան կարիք, սակայն ներկայիս այդ գումարին միայն 14%-ը հայթայթուած է, ձգելով 86%-ի հսկայական բաց մը:

Եռակողմ կոչ՝ միջազգային ընտանիքին

Եունիսէֆը հանդէս եկած է երեք հիմնական պահանջներով.

Ռազմական գործողութիւններու դադարեցում եւ քաղաքացիական ենթակառոյցներու պաշտպանութիւն:

Անվտանգ եւ անարգել մարդասիրական մուտք, յատկապէս դէպի Լիբանանի հարաւային շրջանները:

Անմիջական նիւթական օժանդակութիւն՝ փրկարար աշխատանքները շարունակելու համար:

Առանց քաղաքական լուծման եւ շուտափոյթ միջամտութեան, Միջին Արեւելքի մանուկներուն ապագան կը մնայ մշուշապատ եւ վտանգուած: