Մեծի Տանն Կիլիկիոյ Կաթողիկոսութիւնը մասնակցեցաւ Աստուածամօր Աւետման տօնին նուիրուած հոգեւոր հանդիսութիւններուն
2010 թուականէն սկսեալ, Լիբանանի քրիստոնեայ եւ իսլամ համայնքներու նախաձեռնութեամբ ու միատեղ ճիգով, Սուրբ Կոյս Մարիամի աւետման տօնը կը նշուի իբրեւ պետական տօն: Եզակի իր բնոյթով պետական այս տօնին առիթով, Լիբանանի զանազան շրջաններէն ներս դասախօսական հաւաքոյթներ եւ հոգեւոր հաւաքներ կը կազմակերպուին՝ մասնակցութեամբ քրիստոնեայ եւ իսլամ հոգեւորականներու, քաղաքական գործիչներու, մտաւորականներու եւ երիտասարդներու:
Առ այդ, 24 եւ 25 Մարտ 2026-ին, քրիստոնեայ-իսլամ երկխօսութիւնը ամրապնդելու եւ Լիբանանի մէջ գոյակցութիւնը արմատացնելու նուիրուած կազմակերպութիւններ հաւաքներ կազմակերպեցին: Ն.Ս.Օ.Տ.Տ. Արամ Ա. Վեհափառ Հայրապետին օրհնութեամբ եւ Լիբանանի քրիստոնեայ-իսլամ գործակցութեան մարմինին կազմակերպութեամբ, Հոգշ. Տ. Սարգիս Վրդ. Աբրահամեան մասնակցեցաւ Ռապուէի մէջ տեղի ունեցած միասնական աղօթք-հաւաքին, իսկ Հոգշ. Տ. Մովսէս Աբղ. Եօսուլքանեան՝ NDU համալսարանին մէջ մատուցուած Սուրբ Պատարագին եւ Քրիստոնեայ-Իսլամ Երկխօսութեան Կաթոլիկ Եպիսկոպոսաց Յանձնախումբին ու Միջին Արեւելքի Եկեղեցիներու Խորհուրդին նախաձեռնութեամբ ասորի կաթոլիկ պատրիարքարանին մէջ աղօթք-դասախօսութեան:
Յայտնենք, որ յիշեալ նախաձեռնութեանց առնչուած յանձնախումբերու պատասխանատուները այցելած են Վեհափառ Հայրապետին եւ իր տեսակէտը ուզած են ունենալ իրենց կողմէ կազմակերպուելիք զանազան ծրագիրներու գծով:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
