Ամառային ժամի անցումի բացասական եւ դրական կողմերը

Ամառային ժամի անցումը (Daylight Saving Time, DST) արդէն երկար տարիներ կիրառւում է շատ երկրներում՝ նպատակ ունենալով աւելի արդիւնաւէտ օգտագործել արեւային լոյսը եւ ուժանիւթ խնայել: Սակայն, ինչպէս ցոյց են տալիս վերջին հետազօտութիւնները, այս փոփոխութիւնը մարդու օրգանիզմի համար ունի ինչպէս դրական, այնպէս էլ բացասական կողմեր։

Բացասական ազդեցութիւնները յաճախ նկատելի են անմիջապէս ժամերի փոփոխութիւնից յետոյ: Քնի խանգարումները ամենատարածուած խնդիրն են. մասնագէտների տուեալներով, գարնանային ժամի անցումից յետոյ առաջին օրերին մարդիկ քնում են միջինը 30-60 րոպէ պակաս, ինչն անմիջապէս ազդում է զգայունութեան, ուշադրութեան եւ հոգեբանական վիճակի վրայ: Քնի պակասը, իր հերթին, կարող է բարձրացնել կորտիզոլի մակարդակը, եւ ազդել սրտանօթային առողջութեան վրայ: Որոշ հետազօտութիւններ ցոյց են տալիս, որ DST-ի առաջին օրերին սրտային ինֆարկտների (մեռուկներու) դէպքերը աճում են մօտ 5-10 տոկոսով: Բացի դա, որոշ մարդիկ զգում են տրամադրութեան անկում, քմահաճոյք կամ անհանգստութիւն, յատկապէս նրանց շրջանում, ովքեր աւելի զգայուն են «ցիրկադեան ռիթմ»ի փոփոխութիւնների նկատմամբ:

Միաժամանակ, ամառային ժամանակը ունի կարեւոր դրական ազդեցութիւններ: Աւելի երկար արեւային լոյսը խթանում է ֆիզիկական աշխուժութիւնը, ինչը նշանակում է, որ մարդիկ աւելի յաճախ դուրս են գալիս զբօսանքի, վարժութիւնների կամ մարմնամարզով զբաղուելու համար: Արտաքին գործունէութիւնը ոչ միայն բարելաւում է ֆիզիկական առողջութիւնը, օրինակ՝ սրտանօթային համակարգի աշխատանքը, այլեւ օգնում է D վիտամինի (կենսանիւթի) բնական արտադրութեանը, որը կարեւոր է ոսկորների եւ իմունային (ախտամերժ) համակարգի համար:

Երկար երեկոն բարելաւում է հոգեբանական վիճակը. հետազօտութիւնները ցոյց են տալիս, որ ամառային երկար երեկոները բարձրացնում են աշխուժութիւնը, ուժեղացնում տրամադրութիւնը եւ նուազեցնում ընկճախտին հակուած զգացմունքները: Բացի այդ, աւելի երկարատեւ արեւային լոյսը նպաստում է ընկերային  աշխուժութեանը. մարդիկ աւելի յաճախ հանդիպում են ընկերների եւ ընտանիքի անդամների հետ, մասնակցում բացօթեայ միջոցառումների, ինչը դրական ազդեցութիւն ունի հոգեբանական բարեկեցութեան վրայ եւ նուազեցնում մենակութեան զգացումը:

Նման կերպ, ամառային ժամանակի անցումը աջակցում է բնական ռիթմերի հաւասարակշռմանը, բարելաւում քնի որակը եւ նպաստում օրգանիզմի ներուժի համաչափ օգտագործմանը՝ ողջ օրուայ ընթացքում:

Պատրաստ եղէ՛ք վայելելու ամառային երկար ցերեկային ժամերը:

Համադրեց` ԱՆԻ ԹԱԴԵՒՈՍԵԱՆ

Աղբիւրը` Ասպարէզ