ՀՕՄի Կեդրոնական վարչութիւնը իր կարելիութիւնները ի սպաս կը դնէ Միջին Արեւելքի Հայ գաղութներուն
ՀՕՄի Կեդրոնական վարչութիւնը իր վերջին լիագումարին ընթացքին հանգամանօրէն քննարկեց Միջին Արեւելքի հայ գաղութներուն իրավիճակը, դիմագրաւած մարտահրաւէրները եւ վտանգները՝ ռազմաքաղաքական վերջին զարգացումներու լոյսին տակ:
Կեդրոնական վարչութիւնը վերահաստատեց, որ Միջին Արեւելքի մեր գաղութները, որոնք կենսական եւ անբաժանելի մասն են Հայկական Սփիւռքին, շնորհիւ ազգային-եկեղեցական ղեկավարութիւններուն թափած ճիգերուն, կը շարունակեն իրենց գոյութիւնը եւ առաքելութիւնը՝ հակառակ բազմաթիւ եւ բազմապիսի դժուարութիւններու:
Այս առիթով, ՀՕՄի Կեդրոնական վարչութիւնը կը հաստատէ, որ մօտէն կը հետեւի արձանագրուող զարգացումներուն եւ ամբողջական պատրաստակամութեամբ կը շարունակէ իր բոլոր կարելիութիւնները ի սպաս դնել, որպէսզի Միջին Արեւելքի մեր գաղութները կարենան գոյատեւել այսպիսի վտանգներով լեցուն կացութիւններու մէջ:
Կեդրոնական վարչութիւնը, թարգմանը հանդիսանալով մեր կազմակերպութեան շարքերուն՝ կը յուսայ, որ շուտով վերջ կը գտնեն պատերազմական գործողութիւնները, որպէսզի Միջին Արեւելքի մեր գաղութները իրենց հաւաքական կեանքը շարունակեն՝ բնականոն պայմաններու մէջ:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
