Աշխարհին մէջ սպաննուած են 129 լրագրողներ, որոնց գրեթէ կէսը՝ Կազայի մէջ

Վատիկան Նիուզ – Հայկական Բաժանմունք

Իր 35-րդ տարեկան զեկոյցին մէջ, Լրագրողներու Պաշտպանութեան Կոմիտէն (Cpj) կը յայտարարէ, թէ 2025 թուականին աշխարհի մէջ 129 լրագրողներ սպաննուած են իրենց աշխատանքը կատարելու ժամանակ, ինչ որ 1992 թուականէն ի վեր երկրորդ ամենաբարձր թիւն է։  Զոհերուն գրեթէ կէսը արձանագրուած է Կազայի մէջ, ուր Կոմիտէն Իսրայէլի Պաշտպանութեան Ուժերուն կը վերագրէ 86 լրագրողներու մահուան պատասխանատուութիւնը, որոնց մեծամասնութիւնը պաղեստինցիներ էին։  Զեկոյցը նաեւ կը նշէ յարձակումներուն մէջ անօդաչու թռչող սարքերու գործածութեան աճը եւ Իսրայէլը կը մեղադրէ լրագրողներ թիրախաւորելու մէջ, որոնք յետոյ կը բնութագրուին որպէս զինեալներ՝ առանց վստահելի ապացոյցներու։

Կը յիշատակուին յատուկ դէպքեր, ինչպէս «Al Jazeera»-ի լրագրող Անաս Ալ-Շարիֆի պարագան եւ Խան Եունիսի Նասեր հիւանդանոցին վրայ կատարուած յարձակումը, ուր հինգ լրագրողներ զոհուած են։  Ըստ Cpj-ի, այս գործողութիւնները կը սաստկացնեն միջազգային իրաւունքի խախտումները եւ կը նպատակադրեն լռեցնել քննադատութիւնները։

Զեկոյցին մէջ անդրադարձ կատարուած է Արեւմտեան Ափին մէջ նոր բռնութիւններու մասին, ուր իսրայէլացի բնակիչներ հրդեհած են պաղեստինեան գիւղատնտեսական կառոյցներ՝ Երուսաղէմի մօտ։

Իսրայէլի մէջ Քնեսեթը որդեգրած է Օրինագիծ մը Արեւմտեան Պատի մասին, որով կը պարտադրուի ուղղափառ ծիսակարգը աղօթքներուն ընթացքին, սահմանափակելով ոչ ուղղափառ արարողութիւնները եւ շրջանցելով Բարձրագոյն Դատարանի վերջերս կայացուցած որոշումը՝ ի նպաստ համահաւասար աղօթքի տարածքի ընդլայնման։