Քրիստոնէական համերաշխութեան միջազգային կազմակերպութիւնը հանդիպում ունեցած է Գարեգին Բ-ին հետ

Քրիստոնէական համերաշխութեան միջազգային կազմակերպութեան նախագահ Ճան Այպնըր Հայաստան կ՛այցելէ եւ արդէն ունեցած է քանի մը տեսակցութիւններ։ Իր այցելութեան եւ Հայաստանի մէջ տեղի ունեցող իրադարձութիւններուն գծով ան իր տեսակէտները յայտնեց մամլոյ ասուլիսի մը ընթացքին։

Խօսելով եկեղեցի-իշխանութիւն յարաբերութեանց մասին՝ ան դիտել տուաւ, որ Էջմիածինի մէջ հանդիպում ունեցած է Ամենայն հայոց կաթողիկոսին հետ, որ՝ «ամուր, հաստատուն կանգնած է` պաշտպանելու ազգը, հօտը եւ կատարելու իր պարտականութիւնները»։

«Այսօր առաւօտեան նաեւ կարելի եղաւ բանտին մէջ այցելել Բագրատ արք. Գալստանեանին: Ան նոյն բանտախուցին մէջ էր, ուր 1937ին սպաննուած է իր անունը կրող Բագրատ արքեպիսկոպոս Վարդազարեանը` խորհրդային ուժերուն կողմէ», նշեց ան:

Բագրատ սրբազանը Այպնըրին յանձնած է 2 նամակներ, որոնցմէ մէկը ուղղուած է Միջազգային կրօնական ազատութեան վեհաժողովին, որ այս օրերուն տեղի կ՛ունենայ Ուաշինկթընի մէջ, իսկ միւսը` Միացեալ Նահանգներու փոխնախագահ Ճէյ․ Տի․ Վենսին, որ շուտով Հայաստան եւ Ատրպէյճան պիտի այցելէ։

Այպնըր հաստատեց, որ գործարար Սամուէլ Կարապետեան քաղաքական բանտարկեալ է. «Ան բանտարկուած է եկեղեցւոյ սատարելուն համար: Սամուէլ Կարապետեան կաթողիկոսին սատար կանգնեցաւ եւ նիւթապէս շատ օգնած է եկեղեցիին․ ճիշդ այս տեսակ մարդիկ պոլշեւիկներուն թիրախ կը դառնային, անոնց ունեցուածքը պետականի կը վերածուէր: Այս պարագային եւս գործ ունինք ոչ միայն բանտարկութեան հետ, այլ նաեւ սեփական ձեռնարկութեանց պետականացման»։

Ան նաեւ անդրադարձաւ Արցախի հարցին եւ նշեց, որ 2024ի Հոկտեմբերին Հայաստանի մէջ հանդիպում ունեցած է Արցախէն տեղահանուած անձերուն հետ եւ անոնց ուղղած է երեք հիմնական հարցումներ՝

 1․ Ի՞նչ տեղի ունեցաւ Սեպտեմբեր 2023ին,  

 2․ Ի՞նչ կ՛ուզեն ընել ներկայիս,

 3․ Ինչպէ՞ս կարելի է հասնիլ այդ նպատակին:

«Անոնց յստակ առաջարկը հետեւեալն էր․ կլոր սեղան Ատրպէյճանի եւ Արցախի միջեւ` միջազգային կիզակէտի տակ: Այդ հանդիպման ընթացքին ես խոստացայ՝ «Կը վերադառնամ Զուիցերիա եւ կը փորձեմ ընել բան մը․ ապա Հոկտեմբեր 2024ին ես արտաքին գործոց նախարարութեան ներկայացուցի «Խաղաղութեան ֆորում Լեռնային Ղարաբաղի համար` նպաստելու հայերու վերադարձին» վերնագիրով խնդրագիր, որ արժանացաւ համաձայնութեան», եզրակացուց ան։

Աղբիւրը՝ Ասպարէզ