Մեսրոպեանը տօնեց Բարեկենդանը աշակերտներու, ծնողներու եւ ՀԲԸՄ-ի AVC-ին հետ
Մեսրոպեան վարժարանի աշակերտները, ծնողները եւ ուսուցիչները կրկին միասին հաւաքուեցան՝ ուրախութեամբ նշելու համար Բարեկենդանը՝ Մեծ Պահքին նախորդող հայկական աւանդական գեղեցիկ տօնը, դպրոցի երկրորդ դասարանին մասնակցութեամբ կազմակերպուած տօնական եւ մշակութային հարուստ ձեռնարկի մը ծիրին մէջ։
ՀԲԸՄ-ի Հայկական առցանց համալսարանին (AGBU AVC) հետ համատեղ կազմակերպուած տօնակատարութեան Zoom-ի միջոցով դարձեալ մասնակցեցաւ մեր բոլորին կողմէ միշտ սպասուած սիրելի գործընկերը՝ տիկին Զեփիւռ Ղպլիկեան-Թամէրեանը՝ Հայաստանէն։ Տիկին Զեփիւռ բաժնեկցեցաւ իր գիտելիքները Բարեկենդանի աւանդոյթներուն մասին եւ առանձնակի ջերմութեամբ խօսեցաւ այն խաղերուն մասին, որոնք հայ նախնիները կը խաղային այս տօնին։ Ան արժէքաւոր տեղեկութիւններ հաղորդեց անցեալ սերունդներու ձեռագործ խաղալիքներուն եւ այս սիրուած տօնին մաս կազմող աւանդական կերակուրներուն մասին։
Այս տարուան ձեռնարկը յատկանշական նոր էջ մը բացաւ՝ ծնողներու մասնակցութեամբ, որոնք հրաւիրուած էին իրենց զաւակներուն հետ միասին այս փորձառութիւնը կիսելու։ Աշակերտները ժամանեցին դիմակներով եւ ոգեւորութեամբ լեցուն․ անոնց պատրաստութիւնը ղեկավարած էր հայոց լեզուի ուսուցչուհին՝ օրիորդ Վերժինը, շաբաթներ տեւած նուիրուած աշխատանքով։ Աշակերտները տօնական ոգին արտայայտեցին Բարեկենդանի երգով եւ սրտառուչ խօսքերու միջոցով, մինչ գեղեցիկ ձեւաւորուած սեղանի մը վրայ կը ցուցադրուէին տօնակատարութեան կապուած աւանդական իրեր եւ կերակուրներ։
Տօնակատարութիւնը աւարտեցաւ համեղ շեշտով մը. Մեսրոպեանի ծնողական յանձնախումբը աշակերտները հիւրասիրեց հատիկ-ով, իսկ ծնողները՝ թահինով հաց-ով։ Ամէն ինչ կատարուած էր պատուելու համար հայկական ժառանգութեան հարստութիւնը եւ շեշտելու զայն յաջորդ սերունդին փոխանցելու կարեւորութիւնը։
Աղբիւրը` Մեսրոպեան Վարժարան
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
