Տեառնընդառաջի նախատօնակ` Անթիլիասի մայրավանքին մէջ
Յիսուս Քրիստոսի տաճար ընծայման տօնին` Տեառնընդառաջի նախատօնակի հոգեպարար արարողութիւնը մեծ շուքով նշուեցաւ Անթիլիասի Մայրավանքի Սուրբ Գրիգոր Լուսաւորիչ մայր տաճարին մէջ, նախագահութեամբ եւ հանդիսապետութեամբ Արամ Ա. վեհափառ հայրապետին, ուրբաթ, 13 փետրուար 2026-ի երեկոյեան ժամը 4:00-ին: Սաղմոսասացութիւններու, աղօթասացութիւններու եւ աւետարանական ընթերցանութիւններու աւարտին կատարուեցաւ հոգեպարար աւանդական Անդաստանի արարողութիւնը, որուն աւարտին վեհափառ հայրապետը ժողովուրդի զաւակներուն ուղղեց իր հայրապետական պատգամը:
Հայրապետին պատգամը ուղղուած էր յատկապէս ծնողներուն: Ան բացատրեց եբրայական աւանդութիւնը` մանուկին տաճար ընծայումը` իբրեւ, 40-օրեայ մանուկ Յիսուսի ընծայումով, խորիմաստ աստուածաբանական աւանդութիւն, որովհետեւ այս ընծայումով հաւատացեալը կը հաստատէ Աստուծոյ իր պատկանելիութիւնը եւ շնորհակալութիւն կը յայտնէ Անոր:
Եկեղեցական հոգեպարար արարողութեանց աւարտին, հակառակ տեղատարափ անձրեւին, հաւատացեալները, վեհափառ հայրապետին գլխաւորած թափօրով, ուղղուեցան եկեղեցւոյ շրջափակ, ուր հայրապետին ձեռամբ տեղի ունեցաւ աւանդական հրավառութիւնը: Խարոյկին շուրջ դպրեվանքի աշակերտները երգեցին հոգեւոր ու հայրենասիրական երգեր։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
