Ուաշինկթըն եւ Քիեւ «Կառուցողական» կ՛որակեն Ապու Տապիի բանակցութիւնները

Ուքրանիան, Ռուսիան եւ Միացեալ Նահանգները Ապու Տապիի մէջ խաղաղութեան երկօրեայ «կառուցողական» բանակցութիւններէն ետք զանոնք այս շաբաթ պիտի շարունակեն Արաբական Միացեալ Էմիրութիւններու մայրաքաղաքին մէջ:

23-24 յունուարին «Միացեալ Նահանգները համակարգեցին Ուքրանիոյ եւ Ռուսիոյ հետ եռակողմ հանդիպումներ, զորս սիրալիր կերպով հիւրընկալեցին Արաբական Միացեալ Էմիրութիւնները», «Էքս»-ի վրայ գրած է ամերիկացի բանագնաց Սթիւ Ուիթքոֆ` շարունակելով. «Բանակցութիւնները շատ կառուցողական էին, եւ ծրագրուեցաւ խօսակցութիւնը յաջորդ շաբաթ շարունակել Ապու Տապիի մէջ: Նախագահ Թրամփ եւ իր ամբողջ խումբը նուիրուած են այս պատերազմին խաղաղութիւն բերելուն»:

Ան բանակցութիւններու վերսկսան ճշգրիտ օրը չնշեց:

Ուքրանիոյ նախագահ Վոլոտիմիր Զելենսքի յայտարարած է, որ իր խումբը ներկայացուցած է բանակցութիւններու արդիւնքները, եւ նոյնպէս «կառուցողական» որակած է քննարկումները:

«Բանակցութիւններուն մէջ ներգրաւուած անձերը նիւթերու ցուցակ կազմած են հաւանական նոր հանդիպման համար», ըսած է Զելենսքի:

«Աքսիոս». «Կողմերը Շատ Մօտ Են Փութին–Զելենսքի Հանդիպումին»

Միացեալ Նահանգներու, Ռուսիոյ եւ Ուքրանիոյ պատուիրակութիւններու Ապու Տապիի մէջ բանակցութիւններու յաջորդ փուլը կրնայ տեղի ունենալ 1 փետրուարին: Այս մասին կը հաղորդէ «Աքսիոս»-ը` վկայակոչելով ամերիկացի պաշտօնատար մը:

Ըստ կայքին, ամերիկացի պաշտօնատարներ կը նկատեն, որ Արաբական Միացեալ Էմիրութիւններու մայրաքաղաքին մէջ երկու օրուան վրայ կայացած եռակողմ հանդիպումը կարեւոր քայլ դարձաւ բանակցութիւններու յաջորդ փուլի ճամբուն վրայ:

«Աքսիոս»-ի զրուցակիցներէն մէկը յայտարարած է, որ կողմերը այլ հարցերու կողքին քննարկած են Ռուսիոյ եւ Ուքրանիոյ նախագահներու հանդիպման կարելիութիւնը եւ «շատ մօտ են Փութինի եւ Զելենսքիի հանդիպումին»: Անոր համաձայն, նման հանդիպման նախադրեալ կրնայ դառնալ բանակցութիւններու յաջորդ փուլի յաջողութիւնը:

Ըստ «Ռոյթըրզ»-ին եւ «Աքսիոս»-ին, Ապու Տապիի մէջ բացի եռակողմ բանակցութիւններէն, Ռուսիոյ եւ Ուքրանիոյ պատուիրակութիւնները նաեւ երկկողմանի հանդիպում ունեցած են: Երկօրեայ բանակցութիւններու աւարտին երեք խումբերը միասնաբար ճաշած են: Ճաշի ընթացքին, ինչպէս «Աքսիոս»-ին ըսած է ամերիկացի զրուցակիցներէն մէկը, «պահ եղաւ, երբ բոլորը կարծես թէ ընկերներ ըլլային»: Մէկ այլ պաշտօնատար ալ ըսած է. «Ամէն ինչ այնքան լաւ անցաւ, որքան կարելի էր ակնկալել»:

Կայքի զրուցակիցին համաձայն, «քննարկուած ամէն ինչ, ոչ ոքի քննարկումները կողմերէն ոչ մէկուն շփոթեցուց»:

«Մենք ոչ մէկ հարց քննարկումէ դուրս ձգեցինք», վստահեցուցած է ամերիկացի պաշտօնատարը:

Աղբիւրը` Ազդակ