Սուտանի արիւնալի տագնապը. Մէկ շաբթուան մէջ հարիւրէ աւելի զոհ
Վազգէն Աբարդեան - Վատիկան
Վերջին շաբթուան ընթացքին Սուտանի Տարֆուր շրջանի մէջ կացութիւնը ծայրայեղ վատթարացած է՝ խլելով աւելի քան հարիւր զոհ: Սուտանի բանակին եւ անոր թշնամի «Արագ Աջակցութեան Ուժերուն» (RSF) միջեւ բախումները կեդրոնացած են Ալ-Զուրուք եւ Քերնոյ քաղաքներուն մէջ: Անօդաչու սարքերու ռմբակոծումները եւ յարձակումները պատճառած են տասնեակ քաղաքայիններու մահը, մինչդեռ վիրաւորներուն թիւը կը շարունակէ բարձրանալ:
2023-ի Ապրիլին սկսած այս պատերազմը Սուտանը վերածած է մոլորակի վատթարագոյն մարդկային աղէտի վայր: ՄԱԿ-ի տուեալներով՝ զոհերուն թիւը կը հասնի առնուազն 150,000-ի, իսկ աւելի քան 13 միլիոն մարդ ստիպուած եղած է լքել իր տունը: Այսօր Սուտանը աշխարհի ամենաշատ տեղահանուածներ ունեցող երկիրն է, ուր 30 միլիոնէ աւելի մարդ կարիքը ունի մարդասիրական օգնութեան, իսկ 26 միլիոնը կը տառապի սննդային լուրջ անապահովութենէ:
Տագնապը կը տարածուի նաեւ սահմաններէն դուրս. Յունուար 4-ին, Հարաւային Սուտանի հիւսիսային սահմանագիծին վրայ բռնկած բախումներուն հետեւանքով զոհուած են առնուազն 30 հարաւսուտանցի զինուորներ: Ռազմական կայանի մը վերահսկողութեան համար մղուող այս պայքարը ցոյց կու տայ շրջանային անկայունութեան վտանգը: Մինչ պատերազմը կը քայքայէ երկրին ենթակառուցուածքները, միջազգային օգնութեան կարիքը կը դառնայ կենսական՝ միլիոնաւոր անմեղ կեանքեր փրկելու համար:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
