Էջմիածինի մէջ տեղի ունեցաւ Գերագոյն Հոգեւոր Խորհուրդի ժողովը
Գարեգին Բ. Ամենայն Հայոց կաթողիկոսին նախագահութեամբ՝ 13 Յունուարին, Մայր Աթոռ Սուրբ Էջմիածինի մէջ տեղի ունեցաւ Գերագոյն հոգեւոր խորհուրդի ժողով:
Ս. Էջմիածինը հրապարակեց հետեւեալ հաղորդագրութիւնը.
«Ժողովի օրակարգում ընդգրկուած էին Եկեղեցու վարչական, կանոնական, կարգապահական խնդիրներին առնչուող հարցեր: Եկեղեցի-պետութիւն յարաբերութիւնների եւ ստեղծուած իրավիճակի մասին զեկոյցով հանդէս եկաւ ի.գ.դ. տիար Գէորգ Դանիէլեանը:
«Ընդգծուեց, որ Հայաստանեայց Առաքելական Սուրբ Եկեղեցուն յուզող խնդիրները քննւում են եկեղեցական սահմանուած կարգով համապատասխան կառոյցներում ու առաջադրւում համարժէք լուծումներ: Նշուեց, որ շրջանառուող «ներեկեղեցական հակադրութիւնների» թէզը արհեստածին է եւ նպատակ ունի օրինականացնել իշխանութիւնների ապօրինի միջամտութիւնը Եկեղեցու ներքին գործերին: Արձանագրուեց նաեւ, որ 2025թ. Մայիսի վերջից իշխանութեան նախաձեռնած հակաեկեղեցական արշաւը ստացել է համակարգուած բնոյթ` ուղեկցուելով հակասահմանադրական գործողութիւններով, քրէական հետապնդումներով եւ հոգեւորականների նկատմամբ բռնաճնշումներով:
«Գերագոյն հոգեւոր խորհուրդն իր գնահատանքը յղեց Հայ Եկեղեցուն իրենց աջակցութիւնը ցուցաբերած հաւատաւոր ժողովրդին, ինչպէս նաեւ կառոյցներին եւ առանձին անհատներին, ովքեր օրինական քայլերով իրենց վճռական դիրքորոշումն են արտայայտում ի պաշտպանութիւն Եկեղեցու իրաւունքների: Քաղաքականութեան մէջ Եկեղեցու ներգրաւուած լինելու մեղադրանքը անհիմն եւ անընդունելի համարելով` ԳՀԽը մերժելի նկատեց իշխող ուժի կողմից արհեստական օրակարգերի ձեւաւորմամբ Հայ Եկեղեցին քաղաքական գործընթացների մէջ ներքաշելու փորձերը, ինչը նոր բաժանումներ ու հակառակութիւններ է առաջ բերում ազգային կեանքում:
«Գերագոյն հոգեւոր խորհուրդն նաեւ իր մտահոգութիւնն արտայայտեց տասը եպիսկոպոսների որդեգրած պառակտիչ կեցուածքի, հանրային ելոյթներում Մայր Աթոռի եւ Ամենայն Հայոց կաթողիկոսի հասցէին հնչեցրած զրպարտիչ յայտարարութիւնների ու մեղադրանքների առնչութեամբ: Ժողովականները խստօրէն դատապարտեցին եպիսկոպոսների միանալը վարչապետի կողմից նախաձեռնուած եւ անթաքոյց հովանաւորուող «Հայաստանեայց Առաքելական Սուրբ Եկեղեցու բարենորոգման ծրագրին», ինչպէս նաեւ ՏԻՄ ղեկավարների, իրաւապահ եւ ուժային կառոյցների ներգրաւմամբ թեմակալ առաջնորդների կողմից եկեղեցականների նկատմամբ գործադրուող ապօրինի ճնշումներն ու սպառնալիքները:
«Գերագոյն հոգեւոր խորհուրդը յորդորեց հոգեւորականներին չտրուել հակաօրինական պարտադրանքներին եւ, հաւատարիմ մնալով իրենց կոչմանը, առաջնորդուել բացառապէս Հայոց Եկեղեցու կանոնական կարգով:
«Քննարկելով առկայ իրադրութեան յաղթահարման ուղիները` որոշուեց նախորդ տարեվերջին հրաւիրուած եւ ժամանակաւորապէս յետաձգուած Եպիսկոպոսաց ժողովը եւ աղօթական առանձնացումը կազմակերպել Փետրուար ամսուայ ընթացքում:
«Ժողովը փակուեց «Պահպանիչ» աղօթքով»:
Լուրը՝ Ասպարէզէն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
