ՀՅԴ Պատուիրակութիւնը այցելեց Հայ Կաթողիկէ Մեսրոպեան բարձրագոյն վարժարան եւ «Գարակէօզեան» Հաստատութիւն

ՀՅԴ Լիբանանի Կեդրոնական կոմիտէն նախաձեռնած է լիբանանահայ գաղութին մէջ գործող տարբեր հաստատութիւններու այցելութիւններու` նպատակ ունենալով մօտէն ծանօթանալ անոնց տարած գործունէութեան, տրամադրած ծառայութիւններուն եւ դիմագրաւած դժուարութիւններուն: Արդարեւ, Կեդրոնական կոմիտէն ներկայացնող պատուիրակութիւններ յառաջիկայ օրերուն եւ շաբաթներուն պիտի այցելեն գաղութին մէջ նշեալ հաստատութիւնները եւ հանդիպում ունենան անոնց տնօրէնութիւններուն, խնամակալութիւններուն եւ պաշտօնէութեան հետ:

Այս ծիրին մէջ, երկուշաբթի, 6 հոկտեմբեր 2025-ին, ՀՅԴ Լիբանանի Կեդրոնական կոմիտէի պատուիրակութիւնը` գլխաւորութեամբ Կեդրոնական կոմիտէի ներկայացուցիչ Ալպեր Պալապանեանի, այցելեց Հայ կաթողիկէ Մեսրոպեան բարձրագոյն վարժարան եւ հանդիպում մը  ունեցաւ վարժարանի տնօրէն Կրեկուար Գալուստի հետ: Պատուիրակութեան մաս կազմեցին նաեւ ՀՅԴ Լիբանանի Կեդրոնական կոմիտէի քարտուղար Ճորճ Գրիգորեան եւ Կեդրոնական կոմիտէի անդամ, նախկին նախարար Աւետիս Կիտանեան:

Տնօրէն Կրեկուար Գալուստ գոհունակութիւն յայտնեց պատուիրակութեան այցելութեան համար: Ան ընդգծեց հայկական կառոյցներու համագործակցութեան կարեւորութիւնը` ի շահ համայնքի բարեկեցութեան: Անդրադառնալով դպրոցի շրջակայ տարածքի դժուարութիւններուն` Կրեկուար Գալուստ բարձր գնահատեց Պուրճ Համուտի քաղաքապետութեան նախաձեռնած կառուցման, նորոգութեան եւ մաքրութեան աշխատանքները, ինչպէս նաեւ օժանդակութեան պատրաստակամութիւն յայտնեց:

Անդրադարձ կատարուեցաւ հայ համայնքի դիմագրաւած դժուարութիւններուն, նամանաւանդ վերջին տարիներու տագնապալի եւ պատերազմական վիճակի ընթացքին:

Պալապանեան իր կարգին շեշտեց հաւաքական աշխատանքի կարեւորութիւնը: Ան յայտնեց, որ համայնքի շարունակական գոյութեան եւ բարեկեցութեան համար իւրաքանչիւր անհատ պէտք է իր մասնակցութիւնը ցուցաբերէ եւ համերաշխութեամբ համագործակցի, որպէսզի այսպիսով հաւաքական աշխատանքի շնորհիւ կարողանանք լաւապէս իրագործել համայնքի պահպանման աշխատանքները:

Անդրադարձ կատարուեցաւ նաեւ դպրոցի ներկայ իրավիճակին: Կրեկուար Գալուստ ներկայացուց դպրոցի գործունէութիւնը եւ սկսած ծրագիրները` յայտնելով, որ Հայ կաթողիկէ Մեսրոպեան բարձրագոյն վարժարանը կը շարունակէ յառաջդիմել` հանդիսանալով կրթօճախ մը հայ համայնքի զաւակներուն:

Նաեւ անդրադարձ կատարուեցաւ Լիբանանի տնտեսական տագնապին պատճառով ստեղծուած դժուարութիւններուն, քննարկուեցան նաեւ օժանդակութեան տրամադրման աշխատանքները, որոնք ուսումը հասանելի կը դարձնեն հայ աշակերտին:

Պատուիրակութիւնը հանդիպում մը ունեցաւ նաեւ դպրոցի ուսուցիչներուն եւ անձնակազմին հետ` լսելով անոնց դիմագրաւած առօրեայ դժուարութիւնները եւ մտահոգութիւնները:

Աւարտին, պատուիրակութիւնը շրջեցաւ վարժարանին մէջ` աւելի մօտէն ծանօթանալով անոր գործունէութեան եւ անցուդարձներուն:

Աղբիւրը՝ Ազդակ