Ուիթքոֆ. «Կազայի վերաշինութեան գինը շուրջ 50 միլիառ տոլարով կը գնահատուի, եւ կը կարծենք, թէ գումարները արագօրէն պիտի հաւաքուին»
Միացեալ Նահանգներու նախագահի Միջին Արեւելքի հարցով պատուիրակ Սթիւ Ուիթքոֆ «Սի.Պի.Սի.»-ին յայտնեց. «Կազայի վերաշինութեան գինը շուրջ 50 միլիառ տոլար կը գնահատուի»` նշելով. «Կը կարծենք, որ գումարները արագօրէն պիտի հաւաքուին»:
«Միջին Արեւելքի մէջ կան կառավարութիւններ, որոնք պիտի շտապեն ֆինանսաւորելու, ինչպէս նաեւ եւրոպական մասնակցութիւն կը նախատեսուի», ըսաւ ամերիկացի պատուիրակը:
«Ծրագիրի առաջին փուլը կը վերաբերի անոր իրողապէս ձեռնարկելուն, եւ ատոր վրայ կ՛աշխատիմ», ըսաւ ան:
«Ֆինանսաւորման ապահովումը դիւրին բաժինն է, եւ զայն կարելի է համեմատաբար արագօրէն իրագործել, սակայն իսկական մարտահրաւէրը գլխաւոր համապարփակ ծրագիրն է», յայտնեց Ուիթքոֆ:
«Կ՛աշխատինք խումբի մը հետ փորձագէտներու, որոնք անցնող երկու տարիներուն գլխաւոր ծրագիրները մշակեցին: Իրապէս պատրաստ ու ամբողջական ծրագիրներ ունին», ըսաւ ամերիկացի պատուիրակը:
Ան աւելցուց. «Պիտի ստեղծուի խորհուրդ մը, որ պիտի կոչուի խաղաղութեան խորհուրդ, եւ շատ ուշադիր պիտի ըլլան անոր մէջ աշխատելու համար լաւագոյն կարողութիւնները ընտրելու մէջ»:
«Իրապէս կը խօսինք Միջին Արեւելքի տարբեր երկիրներէ կապալառուներու հետ, որովհետեւ կը կարծենք, թէ շրջանային աջակցութիւնը հիմնական է, եւ անոնք տեղական շուկան ու անոր մեքանիզմները աւելի լաւ գիտեն», յայտնեց Ուիթքոֆ:
Աղբիւրը` Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
