Կարդինալ Փարոլին Կուաթեմալայի մէջ. Միայն Աստուած կրնայ յագեցնել մարդուն խորունկ քաղցը՝ ոչ միայն նիւթական հացի, այլ նաեւ սիրոյ, յոյսի եւ իմաստի կարիքները։
Վազգէն Աբարդեան - Վատիկան
«Միայն Աստուած կրնայ յագեցնել մարդուն ամենախորունկ քաղցը»։ Այս պատգամը փոխանցեց կարդինալ Փիեթրօ Փարոլին՝ Սուրբ Աթոռի Պետական քարտուղարը, Կուաթեմալայի մայրաքաղաքի Մայր տաճարին մէջ մատուցուած Սուրբ Պատարագի ընթացքին։ Կարդինալը երկիր կը գտնուի՝ Սուրբ Աթոռի եւ Կուաթեմալայի միջեւ դիւանագիտական յարաբերութիւններու հաստատման 90-ամեակին առիթով։
Իր քարոզին մէջ կարդինալ Փարոլին ընդգծեց, որ մարդուն կարիքը միայն հացի քաղցը չէ, այլ նաեւ «իմաստի, սիրոյ, յոյսի եւ նոր կեանքի ծարաւը»։ Ան յիշեցուց, որ Աստուածային Նախախնամութիւնը երբեք չէ լքած այս ժողովուրդը եւ անոր հետ քայլող Եկեղեցին։
Կոչ՝ կառուցելու արդար եւ եղբայրական հասարակութիւն
Կարդինալ Փարոլին շեշտեց, որ Աւետարանի բարի լուրը տարածելու ցանկութիւնը կը մղէ Եկեղեցին՝ գրկելու ամբողջ մարդկութիւնը եւ բաց պահելու բոլոր ճանապարհները, որոնք կը տանին դէպի «աւելի արդար, եղբայրական եւ համերաշխ հասարակութեան կառուցում»։
Ան յատուկ կոչ ուղղեց կոտրելու «արհամարհանքի, անտարբերութեան եւ անարդարութեան շրջանակները», որոնք յաճախ կը յառաջանան անհաւասարութեան եւ փտածութեան հետեւանքով։
Լեւոն ԺԴ. քահանայապպետի ողջոյնը Կուաթեմալայի ժողովուրդին
Պատարագի սկիզբը կարդինալը փոխանցեց Լեւոն ԺԴ.-ի ջերմ ողջոյններն ու հայրական օրհնութիւնը Կուաթեմալայի ժողովուրդին։
«Նորին Սրբութիւնը ձեզ շատ կը սիրէ եւ ինծի խնդրեց փոխանցել իր մօտիկութիւնն ու հայրական օրհնութիւնը», ըսաւ Փարոլին՝ ընդգծելով, որ այս այցելութիւնը նաեւ առիթ մըն է հաստատելու երկու կողմերու միջեւ բարեկամութեան, գործակցութեան եւ երկխօսութեան պատմական կապերը։
Այցելութեան ընթացքին կարդինալը այցելեց Մայր Թերեզա Քալքաթացիի անունը կրող խնամքի կեդրոնը եւ Եղբայր Պետրոսի սրբավայրը։ Մայր տաճարին մէջ Սուրբ Պատարագին ներկայ էին եկեղեցական, դիւանագիտական եւ պետական ներկայացուցիչներ, որոնց շարքին՝ Կուաթեմալայի նախագահ Պերնարտօ Արեւալօ, փոխնախագահը, եպիսկոպոսներ, առաքելական նուիրակը, քահանաներ, կրօնաւորներ եւ հաւատացեալներ։
«Տուէք անոնց ուտելու բան»
Կիրակի օրուան Աւետարանի խորհրդածութեան ընթացքին կարդինալ Փարոլին անդրադարձաւ հացի բազմացման հրաշքին եւ Յիսուսի խօսքին՝ «Դուք տուէք անոնց ուտելու բան»։
Ան նշեց, որ այս պատգամը այսօր եւս կը հնչէ Եկեղեցւոյ առաքելութեան կեդրոնին մէջ՝ կոչ ընելով քրիստոնեաներուն՝ անտարբեր չմնալու մարդկային կարիքներուն նկատմամբ։
«Եկեղեցին իր իսկական կոչումը կը գտնէ՝ մարդոց փոխանցելով Աստուծոյ Խօսքի հացը եւ Սուրբ Հաղորդութեան հացը», ըսաւ ան։
Փոքր նուէրները Աստուծոյ ձեռքերուն մէջ կը բազմապատկուին
Կարդինալը նաեւ անդրադարձաւ աշխարհի տառապանքներուն՝ աղքատութեան, մինակութեան, անարդարութեան եւ տառապանքի իրականութիւններուն։
Ան նշեց, որ երբեմն մարդը կը մտածէ, թէ իր ունեցածը շատ քիչ է որեւէ բան փոխելու համար, սակայն Յիսուս կը հրաւիրէ տալ այն, ինչ ունինք։
«Թէեւ մեր հինգ հացերն ու երկու ձուկերը անբաւարար կը թուին, հրաշքը կը սկսի այն պահուն, երբ աշակերտները իրենց ունեցած քիչը կը դնեն Յիսուսի ձեռքերուն մէջ։ Նոյնը կը կատարուի մեր կեանքին մէջ. երբ Տիրոջ կը յանձնենք մեր ժամանակը, կարողութիւնները, առատաձեռնութիւնը եւ նոյնիսկ մեր սահմանափակումները, Ան կը բազմապատկէ այդ պարգեւները՝ շատերու բարիքին համար», ընդգծեց Փարոլին։
Այցելութեան շարունակութիւնը
Կարդինալ Փարոլինի այցելութեան ընթացքին նախատեսուած են հանդիպումներ Կուաթեմալայի նախագահ Պերնարտօ Արեւալոյի, բնիկ ժողովուրդներու ներկայացուցիչներուն, արտաքին գործոց նախարար Կարլոս Ռամիրօ Մարտինէզի եւ դիւանագիտական մարմնի ներկայացուցիչներուն հետ։
Այցելութիւնը պիտի աւարտի եպիսկոպոսներու եւ քահանաներու հետ հանդիպումով, ինչպէս նաեւ Միքսքօ քաղաքին մէջ գտնուող Յաւերժական Երկրպագութեան արքեպիսկոպոսական սրբավայրին մէջ մատուցուելիք Սուրբ Պատարագով։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
