Արք Կալլակեր. «Մեծ աղէտներու այս օրերուն աղօթենք զինաթափ եւ զինաթափող խաղաղութեան համար»։
Վազգէն Աբարդեան - Վատիկան
Յունիս 27-ին, Սուրբ Աթոռի՝ պետութիւններու եւ միջազգային կազմակերպութիւններու հետ յարաբերութիւններու քարտուղար արքեպիսկոպոս Փոլ Ռիչըրտ Կալլակեր Քաունասի մայր տաճարին մէջ նախագահեց Սուրբ Պատարագին՝ նուիրուած Լիթուանիոյ առաջին միացեալ եկեղեցական նահանգի հիմնադրութեան հարիւրամեակին։
Աղօթք Ուքրանիոյ եւ պատերազմէն տուժած ժողովուրդներուն համար
Իր քարոզին մէջ արքեպիսկոպոսը Սուրբ Կոյս Մարիամի բարեխօսութեան յանձնեց պատերազմէն տառապող ժողովուրդները՝ յատկապէս Ուքրանիան, աղօթելով «զինաթափ եւ զինաթափող խաղաղութեան» պարգեւին համար։ Ան ընդգծեց, որ այսօրուան դժուար ժամանակներուն ամբողջ Եկեղեցին կոչուած է ապաւինելու Աստուածամօր պաշտպանութեան։
Լիթուանիոյ նահատակներուն հաւատքի վկայութիւնը
Արք Կալլակեր յիշեցուց խորհրդային հալածանքներու տարիներուն լիթուանացի քահանաներու, կրօնաւորներու եւ հազարաւոր հաւատացեալներու հերոսական վկայութիւնը՝ շեշտելով, որ ամբողջատիրական վարչակարգը չկրցաւ կործանել Եկեղեցին։ Ան յատուկ կերպով անդրադարձաւ Խաչերու Բլուրին, որ դարձած է Քրիստոսի հանդէպ անխախտ հաւատարմութեան խորհրդանիշը։
Նահատակներու արիւնը՝ նոր քրիստոնեաներու սերմ
Յիշելով Տերտուղիանոսի նշանաւոր խօսքը՝ «Նահատակներու արիւնը նոր քրիստոնեաներու սերմն է», արքեպիսկոպոս Կալլակեր հաստատեց, որ Լիթուանիոյ Եկեղեցւոյ հարիւրամեայ պատմութիւնը այդ ճշմարտութեան կենդանի ապացոյցն է։ Ան նաեւ յարգանքով յիշեց երանելի եպիսկոպոս Յուրկիս Մաթուլայթիսը, որ 1926-ին հռչակեց Լիթուանիոյ առաջին եկեղեցական նահանգի հիմնադրութիւնը, ընդգծելով, որ այս յոբելենական տօնակատարութիւնը կոչ մըն է շարունակելու սրբութեան եւ հաւատարմութեան ճանապարհը։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
