Սուրբ Աթոռը կը վերահաստատէ հիւլէական ուժանիւթի խաղաղ օգտագործման իրաւունքը
Վազգէն Աբարդեան - Վատիկան
Սուրբ Աթոռը վերահաստատեց իր աջակցութիւնը հիւլէական ուժանիւթի խաղաղ օգտագործման՝ Միացեալ Ազգերու Կազմակերպութեան մէջ տեղի ունեցած Հիւլէական զէնքերու չտարածման պայմանագրի վերանայման խորհրդաժողովին ընթացքին:
Նիւ Եորքի մէջ կայացած նիստին, Սուրբ Աթոռի պատուիրակութիւնը շեշտեց, որ գիտութիւնն ու արհեստագիտութիւնը պէտք է ծառայեն մարդկութեան բարօրութեան: Ըստ յայտարարութեան, բոլոր պետութիւնները իրաւունք ունին օգտուելու հիւլէական ուժանիւթէն խաղաղ նպատակներով, պայմանաւ որ յարգեն զէնքերու չտարածման յանձնառութիւնները:
Սուրբ Աթոռը յատուկ կարեւորութեամբ նշեց Միջազգային հիւլէական ուժանիւթի գործակալութեան (IAEA) դերը՝ անվտանգութեան երաշխաւորման եւ զարգացող երկիրներուն օժանդակելու հարցով: Շեշտուեցաւ, որ հիւլէական արհեստագիտութիւնը կարեւոր լուծումներ կու տայ բժշկութեան, երկրագործութեան եւ ջուրի կառավարման մարզերուն մէջ:
Յայտարարութեան մէջ նաեւ լուրջ մտահոգութիւն յայտնուեցաւ զինեալ բախումներու ժամանակ հիւլէական կայաններու անվտանգութեան վերաբերեալ: Վատիկանը յիշեցուց միջազգային համաձայնութիւնը, թէ զինուորական յարձակումները նման վայրերու վրայ բացարձակապէս արգիլուած են, քանի որ անոնք կրնան պատճառել աղետալի ճառագայթային հետեւանքներ թէ՛ տուեալ երկրի եւ թէ՛ շրջակայ տարածքներու համար:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
