Սուրբ Աթոռը. Զինաթափումը՝ ապահով խաղաղութեան հասնելու միակ իսկական միջոցը։
Վազգէն Աբարդեան - Վատիկան
Նիւ Եորք – Միջուկային զէնքի չտարածման պայմանագրի (NPT) կողմերու 11-րդ վերանայման խորհրդաժողովի ծիրէն ներս, Սուրբ Աթոռը հանդէս եկաւ ծանրակշիռ յայտարարութեամբ մը՝ ահազանգ հնչեցնելով միջազգային անվտանգութեան հիմքերու սասանման եւ միջուկային սպառազինութեան նոր մրցավազքի վտանգներուն շուրջ։
Վախի վրայ հիմնուած անվտանգութեան քննադատութիւն
Յղում կատարելով Լեւոն ԺԴ. Պապի խօսքերուն՝ Սուրբ Աթոռի ներկայացուցիչը քննադատեց այն «հակամարտային տրամաբանութիւնը», որ այսօր կը տիրէ համաշխարհային քաղաքականութեան մէջ։ Յայտարարութեան մէջ շեշտուեցաւ, որ վախի, ուժի սպառնալիքի եւ փոխադարձ խոցելիութեան վրայ հիմնուած անվտանգութեան ձեւը չի կրնար ապահովել կայուն կամ տեւական խաղաղութիւն։
Արդիականացում եւ նոր սպառնալիքներ
Սուրբ Աթոռը մտահոգութիւն յայտնեց միջուկային զինանոցներու ընդլայնման ու արդիականացման միտումներուն համար, որոնք հսկայական միջոցներ կը խլեն մարդկային հրատապ կարիքներէն եւ կայուն զարգացման ծրագիրներէն։ Յատուկ ուշադրութեան արժանացաւ արհեստական բանականութեան (AI) ներդրումը միջուկային համակարգերու մէջ։ Ըստ յայտարարութեան, որոշումներու կայացումը ինքնաշխատ համակարգերուն վստահիլը կը ստեղծէ բարոյական եւ անվտանգային լուրջ վտանգներ՝ սեղմելով ճգնաժամային պահերուն մարդկային միջամտութեան ժամանակը։
Միջուկային զէնքի լիակատար արգիլման կոչ
Յայտարարութիւնը վերահաստատեց, որ միջուկային զէնքերու ամբողջական բնաջնջումը ոչ թէ հեռաւոր իտէալ մը, այլ անյետաձգելի պատասխանատուութիւն է։ Սուրբ Աթոռը կոչ ուղղեց բոլոր պետութիւններուն՝ միանալ Միջուկային զէնքի արգիլման պայմանագրին (TPNW), որը կը նկատուի լրացուցիչ եւ անհրաժեշտ ուղի մը՝ դէպի զինաթափում։
«Փոխանակ զսպման քաղաքականութիւնը յաւերժացնելու, անհրաժեշտ է վերանորոգուած յանձնառութիւն զինաթափման նկատմամբ. ասիկա միակ հիմքն է արդար, ապահով եւ տեւական խաղաղութեան համար», եզրափակեց Սուրբ Աթոռի ներկայացուցիչը։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
