Սպանիոյ Ֆիլիփ Զ. թագաւորը պիտի ստանձնէ Սանթա Մարիա Մաճորէ Պազիլիքայի նախականոնիկոսի տիտղոսը
Վազգէն Աբարդեան - Վատիկան
Յառաջիկայ ուրբաթ՝ մարտ 20-ին, կէսօրուան ժամը 12:30-ին, Հռոմի Սանթա Մարիա Մաճորէ (Լիպերիան) Պապական Պազիլիքային մէջ տեղի պիտի ունենայ հանդիսաւոր արարողութիւն մը, որուն ընթացքին Սպանիոյ Ֆելիփէ Զ. Թագաւորը պաշտօնապէս պիտի ստանձնէ Պազիլիքայ «Պատուոյ Նախականոնիկոս»-ի տիտղոսը։
Այս մասին հաղորդագրութեամբ մը տեղեկացուցած է Պազիլիքայի վարչութիւնը՝ նշելով, որ այս իրադարձութիւնը կը հանդիսանայ Սպանիոյ թագաւորական տան եւ սոյն սրբավայրին միջեւ դարերու պատմութիւն ունեցող սերտ կապերու վերահաստատումը։
Պատմական յարաբերութիւններ եւ Արարողակարգ
Ֆելիփէ Թագաւորի եւ Լեթիսիա Թագուհիի պաշտօնական այցելութիւնը Վատիկան պիտի սկսի Լեւոն ԺԴ. Սրբազան Քահանայապետին հետ ունենալիք առանձնազրոյցով, որմէ անմիջապէս ետք տեղի պիտի ունենայ Պազիլիքայի արարողութիւնը։
Դարաւոր կապերու խորհուրդը
Սպանիոյ գահին եւ Սանթա Մարիա Մաճորէի միջեւ կապերը սկիզբ առած են դարեր առաջ.
Ոսկեզօծ Առաստաղը. Պազիլիքայի փառաւոր առաստաղը կառուցուած է Աղեքսանդր Զ. Պապի (Ռոտրիկօ Պորճիա) օրով, որ ծագումով սպանացի էր։
Ֆիլիփոս Գ. Թագաւոր. 1603-ին պաշտօնապէս հրաւիրուեցաւ ստանձնելու Պազիլիքայի պաշտպանի եւ նախականոնիկոսի դերը։
Պերնինիի Ստեղծագործութիւնը. Ի նշան երախտագիտութեան՝ 1647-ին Ֆիլիփոս Դ.-ի հաստատած նուիրատուութիւններուն համար, հռչակաւոր արուեստագէտ Ճան Լորենցօ Պերնինի կերտած է թագաւորին պրոնզէ արձանը, որ մինչ օրս կը գտնուի Պազիլիքայի գաւիթին մէջ։
Հոգեւոր Ուխտի Վերանորոգում
Այս յարաբերութիւնները վաւերացուած են նաեւ Պիոս ԺԲ. Պապի 1953-ի «Hispaniarum fidelitas» կոնդակով, որ կը շեշտէ սպանացի ժողովուրդին ջերմեռանդութիւնը այս տաճարին հանդէպ։ Իբրեւ այդ կապի արտայայտութիւն՝ Պազիլիքան ամէն տարի երեք յատուկ Սուրբ Պատարագ կը մատուցէ Սպանիոյ ժողովուրդի բարօրութեան եւ անոր պետութեան գլխաւորին համար։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
