Գերպ. Պալեսթրերօ. Յաւելեալ ներառականութիւն Տաուն ախտանիշ ունեցող անձանց համար. կեանքի մշակոյթի մը պէտքը կայ։
Վազգէն Աբարդեան - Վատիկան
Մարտ 21-ին նշուող Դաուն համախտանիշի համաշխարհային օրուան առթիւ, Սուրբ Աթոռի մշտական դիտորդ՝ Գերապայծառ Էթորէ Պալեսթրերօ, կոչ մը ուղղեց միջազգային հանրութեան։ Ժընեւի ՄԱԿ-ի գրասենեակին մէջ տեղի ունեցած ձեռնարկի ընթացքին, արքեպիսկոպոսը շեշտեց իւրաքանչիւր անհատի արժանապատուութեան պաշտպանութեան անհրաժեշտութիւնը՝ սկսած բեղմնաւորման առաջին իսկ վայրկեանէն։
Անհատը՝ աւելին քան ախտորոշումը
Գերապայծառ Պալեսթրերօ իր ելոյթին մէջ նշեց, որ Դաուն սինտրոմ ունեցող անձինք «աւելին են, քան պարզ ախտորոշում մը կամ վիճակ մը»։ Ըստ անոր, անոնց սերնդաբանութեան ինքնութիւնը զիրենք չի դարձներ «աւելի կամ նուազ մարդկային»։
«Անոնք ունին նոյն սուրբ արժէքը, զոր Արարիչը սիրով դրոշմած է իւրաքանչիւրին վրայ։ Հետեւաբար, անոնք պէտք է լիարժէքօրէն վայելեն իրենց իրաւունքները եւ մասնակից դառնան հասարակական կեանքի բոլոր մարզերուն՝ կրթութենէն մինչեւ աշխատանք ու քաղաքացիական յանձնառութիւն» Ան վերահաստատեց, որ որեւէ կեանք չի կրնար մեկուսացուիլ կամ մերժուիլ՝ հիմնուելով սերնդաբանական տարբերութիւններու վրայ։
Յղում կատարելով Պենետիկտոս ԺԶ. Պապի «Deus Caritas Est» շրջաբերականին, Պալեսթրերօ ընդգծեց, որ արհեստավարժ խնամքը, որքան ալ կատարեալ ըլլայ, բաւարար չէ։
Մարդկայնութիւն: Հիւանդները կարիքը ունին սիրոյ եւ մարդկային ջերմութեան։
Ոչ թէ օգտապաշտութիւն: Կեանքի որակը չի չափուիր արդիւնքներով կամ կարողութիւններով, այլ՝ սիրով։
Դէպի կեանքի մշակոյթ
Իր խօսքի աւարտին, արքեպիսկոպոսը յոյս յայտնեց, որ հաւաքական ջանքերով կարելի պիտի ըլլայ կառուցել «կեանքի եւ մարդկայնութեան մշակոյթ մը», ուր Դաուն սինտրոմ ունեցող իւրաքանչիւր անձ կ՚ընկալուի որպէս եզակի ու անկրկնելի էակ՝ արժանանալով լիակատար յարգանքի։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
