Ռատիօ Վատիկանը կը տօնէ իր 95-ամեակը. «Արհեստական բանականութիւնը գործիք է եւ ոչ թէ ձայն»
Վազգէն Աբարդեան - Վատիկան
Ռատիօ Վատիկանը կը պատրաստուի նշելու իր հիմնադրութեան 95-ամեակը՝ յատուկ եւ արդիական նախաձեռնութեամբ մը, որ պիտի զուգադիպի 2026-ի Փետրուար 13-ի Ռատիոյի համաշխարհային օրուան (WRD) հետ: Այս առթիւ, «Vatican News»-ը պիտի ներկայացնէ եօթը լեզուներով յայտագիրներու շարք մը, որոնք պիտի քննարկեն հաղորդակցութեան ապագան՝ նորագոյն արհեստագիտութեանց լոյսին տակ:
Պատմական ակնարկ եւ արդիականութիւն
Քահանայապետերու ձայնասփիւռը հիմնադրուած է 12 Փետրուար 1931-ին՝ Պիոս ԺԱ. Պապի փափաքով եւ Կուլիելմօ Մարքոնիի կողմէ: Այն կը հանդիսանայ աշխարհի հնագոյն ձայնասփիւռի կայաններէն մէկը, որուն առաքելութիւնն է եղած կապել Սուրբ Աթոռը աշխարհի բոլոր ժողովուրդներուն հետ՝ խօսելով տարբեր մշակոյթներու եւ լեզուներու միջոցով: Այսօր, 95 տարի անց, այդ առաքելութիւնը կը շարունակուի նաեւ «փոտքասթ»-ներու եւ թուային հարթակներու միջոցով:
«Արհեստական բանականութիւնը գործիք է եւ ոչ թէ ձայն» Այս տարուան տօնակատարութեանց կեդրոնական նիւթն է՝ «AI is a tool, not a voice» Արհեստական բանականութիւնը գործիք է եւ ոչ թէ ձայն: Այս կարգախօսը համահունչ է Լեւոն ԺԴ. Պապի՝ 2026-ի Հաղորդակցութեան միջոցներու համաշխարհային օրուան պատգամին հետ, ուր շեշտը կը դրուի մարդկային պատասխանատուութեան, զատորոշման եւ հարազատ ձայնի արժէքին վրայ:
Միջազգային երկխօսութիւն
Եօթը յատուկ յայտագիրները պիտի համախմբեն միջազգային փորձագէտներ, գիտնականներ եւ լրատուամիջոցներու պատասխանատուներ՝ Եւրոպայէն, Ափրիկէէն, Լատին Ամերիկայէն եւ Ասիայէն: Քննարկումները պիտի կեդրոնանան այն հարցին շուրջ, թէ ինչպէ՛ս ռատիոն, որպէս մարդկային յարաբերութեան եւ մօտիկութեան միջոց, կրնայ գոյակցիլ արհեստական բանականութեան հետ՝ առանց կորսնցնելու իր ինքնութիւնը:
Մարդկային ձայնի անփոխարինելիութիւնը
Նախաձեռնութիւնը կը վերահաստատէ, որ թէեւ արհեստագիտութիւնը կրնայ հզօր օժանդակ միջոց ըլլալ կրթութեան, աւետարանութեան եւ հանրային ծառայութեան համար, սակայն ձայնը միշտ պիտի մնայ մարդկային: Ռատիօ Վատիկանը այսպիսով աշխարհին կը յիշեցնէ, որ իսկական հաղորդակցութիւնը հիմնուած է ձայնի, կապի եւ մօտիկութեան վրայ, որոնք միայն մարդկային արարածը կրնայ փոխանցել:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
