Հեծանիւով ուխտագնացութիւն Հռոմի մէջ՝ Սուրբ Ֆիլիփփօ Ներիի հետքերով
Վազգէն Աբարդեան - Վատիկան
Այս յօդուածը կը ներկայացնէ իւրայատուկ ուխտագնացութիւն մը Հռոմի փողոցներով՝ հեծանիւով կատարուած, հետեւելով Սուրբ Ֆիլիփփօ Ներիի հիմնած «Եօթը եկեղեցիներու շրջապտոյտ»-ի հնամենի աւանդոյթին։ Աւելի քան 20 քիլոմեթր երկարութեամբ այս երթուղին կը միացնէ չորս մեծ եւ երեք փոքր տաճարներ՝ ուխտաւորները հրաւիրելով ապաշխարութեան, աղօթքի եւ հոգեւոր նորոգութեան։ Իւրաքանչիւր կայան կը խորհրդանշէ Քրիստոսի չարչարանքներու մէկ դրուագը եւ կոչ կ'ուղղէ յաղթահարելու եօթը մահացու մեղքերը՝ փոխարէնը հայցելով համապատասխան առաքինութիւններն ու Սուրբ Հոգիի պարգեւները։
Ճամբան կը սկսի «Քիէզա Նուովա»-էն, ուր կը հանգչին սուրբին մասունքները, եւ կը շարունակուի դէպի Սուրբ Պետրոսի տաճար, ուր կը խորհրդածուի ժուժկալութեան մասին։ Այնուհետեւ, Տիպերիս գետի երկայնքով ուխտաւորները կը հասնին Սուրբ Պօղոսի տաճար՝ հայցելով համբերութին եւ ապա Սուրբ Սեբաստիանոսի տաճար, որ ուխտագնացութեան սիրտն է։ Յաջորդիւ, ուղին կ'անցնի Լատերանեան Սուրբ Յովհաննէսի տաճարէն եւ Երուսաղէմի Սուրբ Խաչ եկեղեցիէն, ուր կը մեծարուին Խաչելութեան սուրբ մասունքները։
Վերջին հանգրուանները Սուրբ Լաւրենտիոսի եւ Սուրբ Մարիամ Աստուածածնի տաճարներն են, ուր ուխտաւորները կը խնդրեն եղբայրական սիրոյ եւ խոնարհութեան շնորհները։ Այս ուխտագնացութիւնը՝ որ այսօր ալ հազարաւոր հաւատացեալներ կը համախմբէ կը սորվեցնէ յաղթահարել յոգնութիւնն ու փորձութիւնները՝ միշտ վառ պահելով յոյսի լոյսը Սուրբ Կոյսի առաջնորդութեամբ։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
