Ռիմինի կը պատրաստուի դիմաւորելու Լեւոն ԺԴ.-ը՝ երիտասարդներու եւ խոցելի մարդոց ուշադրութեան կեդրոնին
Վազգէն Աբարդեան - Վատիկան
Լեւոն ԺԴ.-ի Ռիմինի այցելութեան նախօրեակին քաղաքը կը պատրաստուի կարեւոր հանդիպումներու։ Օգոստոս 22-ին Քահանայապետը պիտի մասնակցի Ռիմինիի «Ժողովուրդներու բարեկամութեան հանդիպում»-ին, ապա պիտի այցելէ Մայր Տաճար՝ հանդիպելու հիւանդներու, հաշմանդամներու, բանտարկեալներու եւ դժուար կացութեան մէջ գտնուող անձերու հետ, իսկ այցելութիւնը պիտի եզրափակէ նաւահանգիստին մէջ մատուցուելիք Սուրբ Պատարագով։
Ռիմինիի թեմի առաջնորդ Գերպ Նիկոլօ Անսելմի կը նկատէ այս այցելութիւնը վկայութեան եւ ընդունելութեան մեծ առիթ մը։ Ան կը նշէ, որ ամրան ամիսներուն միլիոնաւոր մարդիկ կ՚այցելեն Ռոմանիայի ծովափը, եւ Եկեղեցւոյ համար ասիկա առիթ է ցուցաբերելու բարեհամբոյր վերաբերմունք, երկխօսութեան պատրաստակամութիւն եւ մարդկային տարբերութիւններու մէջ միասին ապրելու կարողութիւն։
Եպիսկոպոսին համաձայն՝ Լեւոն ԺԴ.-ի ներկայութիւնը յատկապէս կարեւոր պատգամ կրնայ ըլլալ երիտասարդներուն։ Ան կը յուսայ, որ Քահանայապետը պիտի քաջալերէ զանոնք բարին գործելու եւ շարունակելու փնտռել այն սէրը, որ կ՚առաջնորդէ մարդը։ Այս պատգամը յատկապէս կարեւոր է այսօր, երբ երիտասարդները կարիք ունին յոյսի եւ քաջալերանքի՝ ուժի ու իշխանութեան մշակոյթին փոխարէն կառուցելու «սիրոյ քաղաքակրթութիւն» մը։
Մայր Տաճարին մէջ Քահանայապետը պիտի հանդիպի շուրջ 650 անձերու, որոնք կը գտնուին կեանքի դժուար հանգրուաններու մէջ։ Եպիսկոպոսը կը շեշտէ, որ հիւանդները, հաշմանդամները, բանտարկեալները եւ բուժական ուղի անցնող երիտասարդները պէտք է մնան ոչ միայն Քահանայապետի, այլեւ Եկեղեցւոյ եւ ամբողջ հասարակութեան ուշադրութեան կեդրոնը։
Այցելութեան վերջին հանգրուանը պիտի ըլլայ նաւահանգիստին մէջ մատուցուելիք Սուրբ Պատարագը՝ այն նոյն վայրը, ուր 1982-ին Սուրբ Յովհաննէս Պօղոս Բ. Սուրբ Պատարագ մատուցած էր։ Գերպ Անսելմի կը շեշտէ, որ ծովը աւետարանական խոր խորհուրդ ունի. ան կը յիշեցնէ Յիսուսի քարոզութիւնը Գալիլիայի ծովուն ափերուն, կոչումը, առաքելութիւնը, փոթորիկին հանդարտեցումը եւ հրաշալի ձկնորսութիւնը։
Այսպիսով, Լեւոն ԺԴ.-ի Ռիմինի այցելութիւնը կը դառնայ հաւատքի, յոյսի, ընդունելութեան եւ առաքելութեան պահ մը՝ միաժամանակ ուղղուած երիտասարդներուն, խոցելի անձերուն եւ ամբողջ հասարակութեան։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
