Լեւոն ԺԴ. Պապը կ՝աղօթէ Հունգարիոյ մէջ փոխադրակառքի արկածի զոհ դարձած ուխտաւորներուն համար
Վազգէն Աբարդեան - Վատիկան
Լեւոն ԺԴ. Պապը խոր ցաւով տեղեկացած է Հունգարիոյ մէջ տեղի ունեցած ողբերգական փոխադրակառքի արկածին մասին, որուն զոհ գացած են Մեժուկորիէ վերադարձող լեհ ուխտաւորներ։ Արկածին հետեւանքով 12 անձեր մահացած են, իսկ 10 ուրիշներ ծանր վիրաւորուած են։
Վատիկանի Պետական քարտուղար կարդինալ Փիեթրօ Փարոլինի ստորագրութեամբ հեռագրով, որ ուղղուած է ուխտաւորներու ծագման թեմերու եպիսկոպոսներուն՝ Փրժեմիշլի արքեպիսկոպոս Ատամ Շալին եւ Ռժեշովի եպիսկոպոս Եան Վոնտրոպային, Քահանայապետը իր «հոգեւոր մօտիկութիւնը» յայտնած է ողբերգութենէն տուժած բոլոր անձերուն։
Լեւոն ԺԴ. յատուկ աղօթքներ կը վերապահէ այն «եղբայրներուն եւ քոյրերուն, որոնք հաւատքի ուխտագնացութենէն վերադառնալով՝ աւարտեցին իրենց երկրային ուխտագնացութիւնը»՝ զանոնք «Աստուծոյ ողորմութեան» յանձնելով։ Ան միաժամանակ Տիրոջմէ կը խնդրէ, որ մխիթարութիւն շնորհէ մահացածներուն ընտանիքներուն եւ հարազատներուն։
Հեռագիրին մէջ Քահանայապետը նաեւ կը հայցէ Սեւծովեան Մարիամ Աստուածածինին՝ Չենստոխովայի Սուրբ Կոյս Մարիամի բարեխօսութիւնը՝ բոլոր զոհերն ու վիրաւորները Աստուծոյ յանձնելով եւ իր առաքելական օրհնութիւնը տալով՝ որպէս հայրական մօտիկութեան եւ քրիստոնէական յոյսի նշան։
Արկածին պատճառները կը հետաքննուին
Ողբերգական պատահարը տեղի ունեցած է օգոստոս 15-ի գիշերը, Հունգարիոյ M3 մայրուղիին վրայ՝ Մեզոքերեստեսի շրջանին մէջ, Պուտափեշտէն շուրջ 140 քիլոմեթր արեւելք։
Նախնական տեղեկութիւններու համաձայն՝ 59 անձեր փոխադրող փոխադրակառքը դուրս եկած է երթեւեկելի գօտիէն, ինկած է փոս մը եւ շրջուած։ Արկածին պատճառներուն շուրջ հետաքննութիւնը կը շարունակուի, իսկ նախնական վարկածներէն մէկը վարորդին քունի անցնելու հաւանականութիւնն է։
Լեհաստանի եւ Հունգարիոյ եպիսկոպոսներու համահաւաք դասերն ալ իրենց ցաւակցութիւնը յայտնած են զոհերու ընտանիքներուն եւ աղօթքներ վերապահած են զոհերուն ու վիրաւորներուն համար։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
