Քասթել Կանտոլֆոյի մէջ Լեւոն ԺԴ. Պատարագ կը մատուցէ Արարչագործութեան Պահպանութեան համար

Ռոպէր Աթթարեան – Վատիկան

Յառաջիկայ Սեպտեմբեր 1-ին, երեկոյեան ժամը 18:30-ին, Արարչագործութեան Խնամքի Աղօթքի Համաշխարհային Օրուան առթիւ, Լեւոն ԺԴ. Պապը Սուրբ Պատարագ պիտի մատուցէ Արարչագործութեան Պահպանութեան համար՝ Քասթել Կանտոլֆոյի Քահանայապետական Պարտէզներու «Borgo Laudato si’»-ի Աստուածամօր Պարտէզին մէջ:

Արարողութիւնը, որ կը կազմակերպուի Մարդկային Համապարփակ Զարգացման Ծառայութեան Քահանայապետական Գրասենեակին եւ «Laudato si’» Բարձրագոյն Ուսման Կեդրոնին կողմէ, պաշտօնապէս պիտի բանայ Արարչագործութեան Ժամանակաշրջանը՝ աղօթքի եւ յանձնառութեան միջ-եկեղեցական ընթացքը, որ պիտի աւարտի Հոկտեմբեր 4-ին՝ Սուրբ Ֆրանչիսկոս Ասսիզացիի տօնին օրը:

Արարողութեան կեդրոնը պիտի ըլլայ Հասարակաց Տան խնամքին, մարդկային արժանապատուութեան եւ խաղաղութեան շուրջ մտածումը: Ինչպէս շեշտեցին Կարդինալ Մայքլ Չերնին եւ Կարդինալ Ֆապիօ Պանճիօն, Արարչագործութիւնը պահպանելը կը նշանակէ նաեւ խնամք տանիլ կեանքին, ամենէն տկար մարդոց եւ ապագայ սերունդներուն:

Պատարագին համար պիտի գործածուի «Արարչագործութեան Պահպանութեան Պատարագի» ծէսը, որ արդիւնք է Սուրբ Աթոռի տարբեր Քահանայապետական Գրասենեակներու համագործակցութեան:

Արարողութեան պիտի մասնակցին նաեւ Գրասենեակի պաշտօնեաներն ու աշխատակիցները, ինչպէս նաեւ «Borgo Laudato si’»-ի աջակիցներն ու գործակիցները:

Այս հանդիպումը հրաւէր մըն է աղօթքը վերածելու գործնական յանձնառութեան՝ Արարչագործութեան պաշտպանութեան եւ ի նպաստ խաղաղութեան, զօրակցութեան ու իւրաքանչիւր անձի արժանապատուութեան վրայ հիմնուած ընկերութեան մը: