Լեւոն ԺԴ. «Եկեղեցին պէտք է ըլլայ ապահով վայր մը՝ զերծ վախերէ, կասկածներէ եւ անվստահութենէ»
Վազգէն Աբարդեան - Վատիկան
Չորեքշաբթի, 17 յունիս 2026-ին, Լեւոն ԺԴ. Սրբազան Քահանայապետը Վատիկանի մէջ ընդունած է Ամերիկեան Մայրցամաքի Մանուկներու Պաշտպանութեան Հետազօտական եւ Ուսումնական Կեդրոնի (CEPROME) ներկայացուցիչները։ Լատին Ամերիկայի տարբեր երկիրներէ ժամանած պատուիրակներուն ուղղուած իր խօսքին մէջ, Պապը երախտագիտութիւն յայտնած է անոնց կատարած կարեւոր աշխատանքին համար, որուն նպատակն է եկեղեցական համայնքները վերածել անվտանգ վայրերու՝ յատկապէս մանուկներու, դեռահասներու եւ խոցելի անձերու համար։
Անվտանգ միջավայրը՝ Աւետարանչութեան հիմք
Սրբազան Հայրը շեշտած է, որ Քրիստոսի հետ հանդիպումը մարդը կ՛առաջնորդէ դէպի սիրով ու ազատութեամբ լեցուն կեանք, մինչդեռ սեռային չարաշահումի պարագաները կը յառաջացնեն հոգեկան ծանր վէրքեր, որոնք կը կաշկանդեն ու կը վնասեն մարդկային ու հոգեւոր զարգացումը։
«Որպէսզի Տիրոջ հետ սիրոյ ճշմարիտ փորձառութիւն մը գոյանայ, անհրաժեշտ է, որ ունենանք անվտանգ տարածքներ», ընդգծած է քահանայապետը՝ յիշեցնելով Աւետարանի պատուիրանը՝ փոքրիկներուն համար գայթակղութեան պատճառ չդառնալու մասին։
Սպանիոյ պատգամը եւ հաւաքական պատասխանատուութիւնը
Լեւոն ԺԴ. վերյիշած է Սպանիա կատարած իր վերջին առաքելական ճամբորդութիւնը, ուր տեղի եպիսկոպոսներուն հետ հանդիպման ընթացքին անդրադարձած էր զոհերու կրած ցաւին.
Եկեղեցւոյ առաքելութիւնը: «Եկեղեցական համայնքը կոչուած է պատասխանելու մտիկ ընելով, ճշմարտութեամբ, արդարութեամբ, հատուցմամբ եւ կանխարգիլման ու խնամքի մշակոյթի հանդէպ աւելի վճռական յանձնառութեամբ»։
Համատեղ պարտականութիւն: Պապը նշած է, որ թէեւ այս մէկը նախ եւ առաջ հովիւներու պարտականութիւնն է, սակայն կը վերաբերի Եկեղեցւոյ բոլոր անդամներուն, եւ CEPROME-ի մասնագէտները զայն ստանձնած են նաեւ արհեստավարժ մակարդակով։
Վախէ եւ կասկածէ զերծ տարածքներ
Ողջունելով ներկաները՝ Սրբազան Հայրը քաջալերած է զանոնք յառաջ տանիլ իրենց գործունէութիւնը՝ սերտացնելով գործակցութեան ցանցերը տեղական եկեղեցիներու եւ քաղաքացիական հաստատութիւններու միջեւ։
«Իմ փափաքս է, որ Եկեղեցւոյ բոլոր տարածքները իսկապէս ըլլան Յիսուս Քրիստոսի հետ պտղաբեր հանդիպման վայրեր՝ զերծ վախերէ, կասկածներէ կամ անվստահութենէ», եզրափակած է Պապը՝ պատուիրակներուն եւ անոնց ընտանիքներուն շնորհելով իր Առաքելական Օրհնութիւնը։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
