Լեւոն ԺԴ. Պապը իր ցաւակցութիւնը յայտնեց Կարդինալ Քամիլլօ Ռուինիի մահուան առթիւ
Վազգէն Աբարդեան - Վատիկան
Լեւոն ԺԴ. քահանայապետը ցաւակցագիր մը յղեց Հռոմի թեմի Պապական ընդհանուր փոխանորդ, Կարդինալ Պալտասարէ Ռէյնային՝ իր խորին վիշտն ու երախտագիտութիւնը յայտնելով Հռոմի թեմի վաստակաւոր փոխանորդ, Կարդինալ Քամիլլօ Ռուինիի մահուան տխուր առթիւ։
Յունիս 17, 2026 թուակիր պաշտօնական գրութեան մէջ, Սրբազան Քահանայապետը բարձր գնահատած է հանգուցեալ կարդինալին երկարամեայ ու նուիրեալ ծառայութիւնը եկեղեցական անդաստանէն ներս՝ զայն որակելով որպէս «յարգուած եկեղեցական մը», որ մեծ գործունէութիւն ծաւալած է նախ Ռեճիօ Էմիլիա-Կուասթալայի թեմին մէջ, ապա՝ որպէս տեղակալ եպիսկոպոս, եւ ի վերջոյ իր ամբողջ կեանքը նուիրած է Հռոմի թեմի ու Իտալիոյ եկեղեցւոյ պայծառացման:
«Այս փորձառու եւ իմաստուն եղբօր յիշատակումը, որ օժտուած էր խորունկ հաւատքով, սուր միտքով ու հեռատես հայեացքով, կը յիշեցնէ անոր բեղուն աշխատանքը Իտալիոյ Եպիսկոպոսաց Համաժողովին մէջ եւ մշակոյթի աշխարհին հետ անոր հաստատած արդիւնաւէտ երկխօսութիւնը», նշուած է Պապին հեռագիրին մէջ:
Առաքելական Օրհնութիւն սգակիրներուն
Նորին Սրբութիւնը իր սրտակցութիւնն ու մօտիկութիւնը յայտնած է եպիսկոպոսական խորհուրդին, Հանգուցեալի ընտանեկան պարագաներուն,
Հռոմի քահանայական դասուն եւ բոլոր հաւատացեալներուն։
Լեւոն ԺԴ. Պապը հեռագիրը աւարտած է հայցելով Աստուածամօր բարեխօսութիւնը, որպէսզի Տէրը հանգուցեալ կարդինալին հոգին ընդունի Երկնային Երուսաղէմի մէջ, եւ իր Առաքելական Օրհնութիւնը փոխանցած է բոլոր անոնց, որոնք կը սգան այս կորուստը, յատուկ երախտագիտութիւն յայտնելով նաեւ անոնց, որոնք խնամք ու հոգատարութիւն ցուցաբերած են հանգուցեալ ծիրանաւորին կեանքի վերջին օրերուն։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
