Լեւոն ԺԴ. Պապին պատգամը՝ տարեցներու եւ մեծ մայրերու ու հայրերու համաշխարհային օրուան առթիւ. «Ես երբեք քեզ չեմ մոռնար»։

Վազգէն Աբարդեան - Վատիկան

Երկուշաբթի, 15 Յունիս 2026-ին, Սուրբ Աթոռը հրապարակեց Լեւոն ԺԴ. Սրբազան Քահանայապետին պաշտօնական պատգամը՝ Յուլիս 26-ին նշուելիք Տարեցներու եւ Մեծ Մայրերու ու Հայրերու Զ. Համաշխարհային Օրուան առթիւ։ Պապական պատգամին առանցքը հանդիսացած է Եսայի մարգարէի հետեւեալ տողը. «Ես տարբեր եմ, քեզ երբեք չեմ մոռնար» (Ես. 49,15)։

Այս ներշնչող գրութեամբ, Քահանայապետը ուղղակիօրէն կը դիմէ աշխարհի բոլոր տարեցներուն՝ փոխանցելով անոնց յոյսի, սիրոյ եւ մխիթարութեան պատգամ մը, յատկապէս այնպիսի ժամանակաշրջանի մը մէջ, երբ առանձնութիւնն ու լքուածութեան զգացումը կը ճնշեն բազմաթիւ ծերունիներու սրտերը։

Աստուածային Սէրը՝ Ընդդէմ Առանձնութեան եւ «Անանունութեան»

Իր պատգամին մէջ, Լեւոն ԺԴ. Պապը կը նշէ, թէ Աստուծոյ սէրը աւելի մեծ է, քան մօր մը սէրը իր զաւկին հանդէպ։ Սրբազան Հայրը կը յայտնէ, թէ ցաւօք սրտի, այսօր շատ մը տարեցներ կ՚ապրին այնպիսի տեղեր, ուր կը տիրէ կատարեալ առանձնութիւն, կամ խնամատարական հաստատութիւններու մէջ, ուր մարդ անհատը կը վերածուի պարզապէս մահճակալի թիւի մը կամ հիւանդութեան անուանումի մը։

«Աստուծոյ սէրը, որ ոչ մէկը կը մոռնայ, կը ներկայանայ իբրեւ արդարութեան արարք եւ պատասխան այն անանունութեան, որուն մէջ յաճախ կը կորսուի մարդկային կեանքը», կը գրէ Քահանայապետը։

Կոչ Երիտասարդներուն. «Այցելեցէ՛ք Ձեր Մեծ Մայրերուն ու Հայրերուն»
Սրբազան Հայրը յատուկ կոչ կ՚ուղղէ երիտասարդ սերունդին՝ վերակենդանացնելու տարեցները այցելելու գեղեցիկ սովորութիւնը։ Ան կը շեշտէ, թէ թուայնացած (digital) դարաշրջանը կրնայ բազմապատկել կապերը, բայց մարդկային սիրտը միշտ կարիքը ունի ֆիզիքական մօտիկութեան եւ ջերմութեան։

Պապը կը քննադատէ նաեւ այն տնտեսական դրութիւնը, որ հիմնուած է միայն շահի վրայ եւ կը տկարացնէ ընտանեկան կապերը, ինչպէս նաեւ կը յիշէ այն տարեցները, որոնց զաւակները ստիպուած գաղթած են կամ կը պատերազմին։

Ծերութիւնը՝ Իբրեւ Հոգեւոր Վերածնունդի Ժամանակաշրջան

Պատգամին մէջ կարեւոր տեղ կը գրաւէ հոգեւոր կեանքի անդրադարձը։ Լեւոն ԺԴ. կը նկատէ, թէ այսօր, անցեալի համեմատութեամբ, շատեր կը ծերանան առանց հաւատքի իրական փորձառութիւն ունենալու։ Սակայն, ըստ Քահանայապետին, ծերութիւնը լաւագոյն առիթն է սկսելու կամ վերսկսելու հոգեւոր կեանքը. «Երբեք ուշ չէ Աստուծոյ դիմելու համար»։

Յղում ընելով Ֆրանչիսկոս Պապի խօսքերուն, ան տարեցները կը կոչէ «նոր ժողովուրդ», քանի որ մարդկութեան պատմութեան մէջ տարեցներու թիւը երբեք այսքան բարձր չէ եղած։ Ան կը քաջալերէ զանոնք չվախնալու իրենց տկարութենէն կամ խոցելիութենէն, որովհետեւ այդ տկարութիւնն է, որ սիրտը կը բանայ փոխադարձ օգնութեան եւ խաղաղութեան։

Աղօթք՝ Յանուն Համաշխարհային Խաղաղութեան

Պատգամի աւարտին, Լեւոն ԺԴ. Սրբազան Քահանայապետը, անդրադառնալով ներկայ պատերազմական եւ ընկերային բռնութիւններով լեցուն ժամանակներուն, տարեցներուն կոչ կ՚ուղղէ միանալու իրեն՝ աղօթելու համար աշխարհի խաղաղութեան համար, որպէսզի թոռնիկները մեծնան ապահով աշխարհի մը մէջ։ Ան շնորհակալութիւն կը յայտնէ բոլոր տարեցներուն իրենց ամէնօրեայ աղօթքներուն եւ Վարդարանի ջերմեռանդութեան համար։