Լեւոն ԺԴ. Պապ. «Բարի լրատուութիւնը պէտք է հեռու մնայ կեղծ լուրերու եւ բեւեռացումներու թմրեցուցիչէն»

Վազգէն Աբարդեան - Վատիկան

Իտալական «L’Adige» օրաթերթի հիմնադրման 80-ամեակին առթիւ յղած իր պատգամին մէջ, Լեւոն ԺԴ. Պապը շեշտած է որակեալ լրատուութեան հրամայականը՝ զայն նմանցնելով «ջուրի, որ կը յագեցնէ մարդոց գիտելիքի ծարաւը եւ կը սնուցանէ խղճմտանքը»։ Սրբազան Քահանայապետը կոչ ուղղած է լրագրողներուն՝ հեռու մնալու դատարկախօսութիւններէն եւ իրականութեան թափանցիկ ու արդար մեկնաբանութիւն ջամբելու ընթերցողներուն։

Անդրադառնալով արդի աշխարհի մարտահրաւէրներուն՝ Պապը նշած է, որ տեղեկատուական դաշտի միակ փրկութիւնը որակն է։ Ըստ անոր, հարկ է կառավարել արդի արհեստագիտութիւնը (թեքնոլոճի)՝ առանց տեղի տալու միակողմանի մտածելակերպի (միամիտ միտքի) պարտադրանքին, եւ յարգել տարբեր կարծիքները։

«Պէտք չէ անձնատուր ըլլալ շահոյթներն աւելցնելու գայթակղութեան՝ կեղծ լուրերու (fake news) եւ արհեստական բեւեռացումներու թմրեցուցիչին դիմելով»,— ընդգծած է Քահանայապետը։

Իր պատգամի աւարտին, Լեւոն ԺԴ. Պապը մաղթած է, որ պատմական թերթը շարունակէ հանդիսանալ ճշմարտութեան գործիք, պատմութեան ու յիշողութեան պահապան եւ մարդկայնութեան խմորիչ։