Լեւոն ԺԴ. Պապը ընդունեց Իտալիոյ Եպիսկոպոսաց Համահաւաք դասի աշխատակիցները
Վազգէն Աբարդեան - Վատիկան
Շաբաթ, 2 մայիս 2026-ին, Վատիկանի մէջ Լեւոն ԺԴ. Քահանայապետը ընդունեց Իտալիոյ Եպիսկոպոսաց Համահաւաք դասի աշխատակիցներն ու անոնց ընտանեկան պարագաները։ Իր խօսքին մէջ Նորին Սրբութիւնը վեր առաւ եկեղեցական կառոյցներէն ներս կատարուող «անտեսանելի» աշխատանքի կարեւորութիւնը՝ զայն որակելով իբրեւ հաւատքի կենդանի վկայութիւն։
Առօրեայ Հաւատարմութիւնը որպէս Սրբութեան Ուղի
Քահանայապետը իր երախտագիտութիւնը յայտնեց աշխատակիցներուն՝ մանրակրկիտ ու նուիրեալ ծառայութեան համար։ Ան յատուկ շեշտեց, որ իւրաքանչիւր գործ՝ ըլլայ այդ վարչական տուեալներու մշակում, ժողովներու պատրաստութիւն կամ աշխատավայրի խնամք, էական նշանակութիւն ունի Եկեղեցւոյ առաքելութեան համար։
«Նոյնիսկ ամենապարզ ու սովորական պարտականութիւնները՝ ինչպէս կարգապահութիւնը, համբերատար ունկնդրութիւնը կամ շրջապատի հանդէպ խնամքը, մեծ են Աստուծոյ առջեւ, եթէ կատարուին հաղորդականութեան ոգիով», ըսաւ Սրբազան Հայրը։
«Ծառայութիւն՝ Ծառայութեան Մէջ»
Անդրադառնալով Եպիսկոպոսաց Համահաւաք դասի դերին՝ Լեւոն ԺԴ. նշեց, որ գրասենեակային աշխատանքը լոկ վարչարարութիւն չէ, այլ «ծառայութիւն՝ ծառայութեան մէջ»։ Այսինքն՝ աշխատակիցները իրենց գործով թիկունք կը կանգնին եպիսկոպոսներուն եւ տեղական եկեղեցիներուն, որպէսզի վերջիններս կարենան արդիւնաւէտօրէն քարոզել Աւետարանը։ Նորին Սրբութիւնը նկատել տուաւ, որ եկեղեցւոյ մէջ կեդրոնը երբեք չեն կրնար ըլլալ գրասենեակները կամ ծրագիրները, այլ միայն Քրիստոսը, որուն շուրջ պէտք է հիւսուի իւրաքանչիւր գործունէութիւն։
Պատկանելիութիւն եւ Առաքելութիւն
Սրբազան Քահանայապետը յորդորեց ներկաները չըլլալ սոսկ «հանդիսատեսներ», այլ ապրիլ Եկեղեցւոյ նկատմամբ խոր պատկանելիութեան զգացումով։ Ան պատգամեց աշխատավայրը վերածել աւետարանական տարածքի, ուր տիրէ փոխադարձ յարգանքը, խոնարհութիւնը եւ սէրը։
Անդրադառնալով ներկայ դարաշրջանի խոր փոփոխութիւններուն՝ ընտանիքի, կրթութեան եւ հաղորդակցութեան ոլորտներուն մէջ, Պապը կոչ ուղղեց.
Չփակուիլ սեփական անձի շուրջ. Բացուիլ աշխարհի կարիքներուն։
Չվախնալ մարտահրաւէրներէն. Աւետարանը հասցնել իւրաքանչիւր մարդու յոյսերուն ու տագնապներուն։
Կամուրջներ կառուցել. Ըլլալ հաշտութեան եւ ընդունելութեան գործիքներ։
Օրհնութիւն եւ Յանձնառութիւն
Իր խօսքի աւարտին, Լեւոն ԺԴ. օրհնեց աշխատակիցներու ընտանիքները՝ յատուկ յիշատակելով երեխաները, տարեցներն ու հիւանդները։ Ան Իտալիոյ եկեղեցւոյ ընթացքը յանձնեց Սուրբ Կոյս Մարիամի, Սուրբ Ֆրանչիսկոս Ասիզացիի եւ Սուրբ Կատարինէ Սիենացիի բարեխօսութեան։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
