Լեւոն ԺԴ Պապ. «Գիտութիւնը եւ հաւատքը կը սորվեցնեն պահպանել մոլորակը եւ խոցելիները»

Վազգէն Աբարդեան - Վատիկան

Երկուշաբթի, 11 Մայիս 2026-ին, Լեւոն ԺԴ Պապը Վատիկանի մէջ ընդունեց «Vatican Observatory Foundation-Վատիկանի Աստղադիտարանի Հիմնադրամ»ի անդամները։ Իր արտասանած ճառին մէջ, Սրբազան Քահանայապետը վերահաստատեց Եկեղեցւոյ անվերապահ աջակցութիւնը գիտական հետազօտութիւններուն՝ շեշտելով, որ աստղագիտութիւնը կամուրջ մըն է երկրայինի եւ աստուածայինի միջեւ։

Գիտութիւնը որպէս ճշմարտութեան գործիք

Յիշեցնելով Լեւոն ԺԳ Պապին կողմէ 135 տարի առաջ Աստղադիտարանի վերահիմնադրումը, Լեւոն ԺԴ նշեց, որ եթէ անցեալին նպատակը գիտութեան եւ կրօնի միջեւ հակասութիւնը հերքելն էր, ապա այսօր մարտահրաւէրը աւելի լուրջ է։

«Այսօր գիտութիւնն ու կրօնը կը դիմագրաւեն սպառնալիք մը. անոնց կողմէ, որոնք կը հերքեն հենց առարկայական ճշմարտութեան գոյութիւնը», ըսաւ Սրբազան Պապը։

Ան ընդգծեց, որ թէ՛ գիտութիւնը եւ թէ՛ Եկեղեցին յստակօրէն կը սորվեցնեն մեր մոլորակը պահպանելու եւ տկարներուն հոգ տանելու սուրբ պարտականութիւնը՝ ընդդէմ անխնայ շահագործման։

Երկնակամարը՝ տիեզերական յոյսի աղբիւր

Քահանայապետը յատուկ անդրադարձ կատարեց աստղագիտութեան մարդկային եւ հոգեւոր չափումին. «Երկնքի խորհրդածութիւնը մեզ կը հրաւիրէ տեսնելու մեր վախերն ու թերութիւնները՝ Աստուծոյ անհունութեան լոյսին ներքոյ։ Գիշերային երկինքը գեղեցկութեան գանձ մըն է՝ բաց բոլորին առջեւ, թէ՛ աղքատներուն եւ թէ՛ հարուստներուն համար. այսքան ցաւալիօրէն բաժնուած աշխարհի մը մէջ անիկա կը մնայ ուրախութեան վերջին իսկապէս տիեզերական աղբիւրներէն մէկը»։

Սրբազան Հայրը նաեւ ցաւով նշեց, որ նոյնիսկ այս պարգեւը այժմ վտանգուած է։ Յառաջ բերելով Պենետիկտոս Պապի խօսքերը՝ ան ըսաւ. «Մենք մեր երկինքը լեցուցած ենք մարդակերտ լոյսով, որ մեզ կը կուրցնէ այն լոյսերուն հանդէպ, զորս Աստուած հոն զետեղած է. անիկա յարմար պատկեր մըն է հենց մեղքին» (հմմտ. Քարոզ, 7 ապրիլ 2012)։

Երախտագիտութիւն եւ առաքելութիւն

Լեւոն ԺԴ իր խորին երախտագիտութիւնը յայտնեց Հիմնադրամի կատարած աշխատանքին համար՝ նշելով. «Ձեր յանձնառութիւնը թոյլ կու տայ Վատիկանի գիտնականներուն կառուցողական կերպով շփուելու լայն հասարակութեան եւ համաշխարհային գիտական համայնքին հետ։ Ձեր առատաձեռնութիւնը կարելիութիւն կու տայ Աստղադիտարանին՝ աստղագիտութեան սքանչելիքները բաժնեկցելու աշխարհի տարածքին գտնուող ուսանողներու հետ, ինչպէս նաեւ աշխատանոցներ ու ամառնային դպրոցներ առաջարկելու կրթական մշակներուն։ Ձեր նուիրումին շնորհիւ է, որ Աստղադիտարանի հեռադիտակներն ու տարրալուծարանները կը մնան այն, ինչ որ միշտ նախատեսուած էին ըլլալու. վայրեր, ուր Աստուծոյ արարչագործութեան փառքը կը դիմաւորուի ակնածանքով, խորութեամբ եւ ուրախութեամբ»։

Յիշեցնելով, որ քրիստոնէութիւնը «Մարմնացման կրօն» է, Պապը եզրափակեց. «Տիեզերքի ծագումն ու գործելակերպը հասկնալու տենչը ոչ այլ ինչ է, եթէ ոչ Աստուծոյ հանդէպ մարդկային հոգիի անհանգիստ փափաքի արտացոլումը»։

Հանդիպման աւարտին, Նորին Սրբութիւնը իր օրհնութիւնը բաշխեց ներկաներուն եւ անոնց ընտանիքներուն՝ քաջալերելով շարունակել արարչագործութեան գեղեցկութեան հետազօտման նուիրական գործը։