Լեւոն ԺԴ. Պապին պատգամը՝ Թուաբանութեան միջազգային օրուան առթիւ
Վազգէն Աբարդեան - Վատիկան
Թուաբանութեան միջազգային օրուան առթիւ, որ կը նշուի այսօր՝ մարտ 13-ին, Լեւոն ԺԴ. իր օրհնութիւնն ու պատգամը յղած է գիտական հանրութեան: Վատիկանի պետական քարտուղար կարդինալ Փիեթրօ Փարոլինի ստորագրութեամբ յղուած պատգամը հասցէագրուած է թուաբանութեան միջազգային օրուան նախագահ, փրոֆեսէօր Պէթիւլ Թանպային:
Այս տարուան «Թուաբանութիւն եւ յոյս» խորագիրը կրող ձեռնարկին առթիւ, Քահանայապետը շեշտած է գիտութեան դերը մարդկութեան առջեւ ծառացած բազմաթիւ մարտահրաւէրներու յաղթահարման գործին մէջ՝ յատկապէս անդրադառնալով արհեստական բանականութեան եւ արագընթաց արհեստագիտական զարգացումներուն:
Իր պատգամին մէջ, Լեւոն ԺԴ. Պապը թուաբանութեան մասնագէտներուն կոչ ըրած է ըլլալու «յոյսի նշաններ» եւ մշտապէս հաշուի առնելու գիտական յայտնագործութիւններու բարոյական չափանիշները: Յիշեցնելով իր ուսուցչական անցեալը՝ Նորին Սրբութիւնը շեշտած է, որ լոկ գիտելիքը բաւարար չէ, եթէ մարդ չի գիտակցիր իր ինքնութիւնը եւ կեանքի իմաստը:
«Աղօթք կը բարձրացնեմ, որպէսզի ձեռնարկին մասնակիցները ուշադիր ըլլան մարդկային սրտի խորքային հոգեւոր կարիքներուն, ձգտին մարդկայնացնելու թուային ոլորտը եւ զայն վերածելու եղբայրութեան ու ստեղծագործութեան առիթի»,– նշուած է պատգամին մէջ:
Նորին Սրբութիւնը պատգամը աւարտած է մաղթելով Թուաբանութեան միջազգային օրուան ձեռնարկի մասնակիցներուն իմաստութեան, ուրախութեան եւ խաղաղութեան աստուածային օրհնութիւններ:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
