Լեւոն ԺԴ. «Աղօթքը կը փոխէ պատմութիւնը, պատերազմներէ զերծ դարաշրջան մը անհասանելի չէ»։
Վազգէն Աբարդեան - Վատիկան
Լեւոն ԺԴ. Սրբազան Քահանայապետը յատուկ պատգամ մը ուղղեց Չ իքակոյի «Լոյոլա» համալսարանին մէջ հաւաքուած «Խաղաղութեան եւ Հաշտութեան Միջազգային Հանդիպում»-ի մասնակիցներուն: Պապը ջերմօրէն ողջունեց համալսարանական ուսանողներու, գիտնականներու եւ առաջնորդներու այս նախաձեռնութիւնը, որ կը շարունակէ 2022-ին Ֆրանչիսկոս Պապին կողմէ սկսած «Կամուրջներ կառուցելու» (Building Bridges Initiative) ծրագիրը:
Նորին Սրբութիւնը իր պատգամին մէջ շեշտեց, որ պատերազմի եւ բռնութեան վէրքերով լեցուն մեր ժամանակներուն մէջ, այսպիսի հանդիպումները հրատապ անհրաժեշտութիւն են: Պապը առաջադրեց երեք հիմնական սկզբունքներ՝ խաղաղութեան հասնելու համար: Առաջին, իսկական խաղաղութիւնը պարզապէս հակամարտութեան բացակայութիւնը չէ, այլ՝ Աստուծոյ պարգեւը, որ աշխարհի խաղաղութենէն տարբեր է: «Քրիստոնեաները կոչուած են Քրիստոսի հետ գործակից ըլլալու՝ ընտանիքներու, համայնքներու եւ ամբողջ աշխարհի մէջ ներդաշնակութիւն տարածելու համար», ըսաւ Պապը:
Երկրորդ, համաշխարհային մակարդակի վրայ համաձայնութիւն ստեղծելու համար անհրաժեշտ է միջազգային հանրութեան մասնակցութիւնը՝ ի նպաստ հասարակաց բարիքին, որ կը վերանայ սահմաններէն ու կրօնական աւանդոյթներէն: Պապը յորդորեց զարգացնել համակարգային եւ միջառարկայական համագործակցութիւնը՝ միացնելով կրթական հաստատութիւնները, գիտնականները եւ առաջնորդները:
Վերջապէս, Նորին Սրբութիւնը հաստատեց, որ իրական ներդաշնակութեան արմատը Աստուծոյ կողմէ Յիսուս Քրիստոսի մահուամբ ու յարութեամբ բերուած հաշտութիւնն է: Պապը յատուկ շեշտադրում կատարեց աղօթքի ուժին վրայ՝ նշելով. «Երբ տարբեր կրօնական աւանդոյթներու պատկանող մարդիկ կը միանան աղօթքի մէջ, անիկա պատմութեան ընթացքը փոխելու կարողութիւն ունի»:
Պատգամը աւարտելով՝ Լեւոն ԺԴ. Պապը քաջալերեց հանդիպման մասնակիցները՝ հաւատալու, որ հակամարտութենէ զերծ դարաշրջան մը կարելի է կերտել: Ան իր հայրական օրհնութիւնը բաշխեց ներկաներուն՝ իբրեւ Տիրոջ խաղաղութեան ու ուրախութեան գրաւական:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
