Թող դադրի ռումբերուն շառաչիւնը, լռեն զէնքերը և բացուի երկխօսութեան դաշտ մը. Լեւոն ԺԴ. Պապին կոչը

Ռոպէր Աթթարեան - Վատիկան

Լեւոն ԺԴ. Սրբազան Պապը Կիրակի 8 Մարտ 2026-ին, Սուրբ Պետրոս հրապարակին վրայ համախմբուած ուխտաւորներու ներկայութեամբ արտասանած կիրակնօրեայ Մարեմեան աղօթքի աւարտին, խօսքը ուղղելով ներկաներուն ըսաւ.

Թող լռեն զէնքերը

Իմ սիրելի եղբայրներ և քոյրեր, Իրանէն և ամբողջ Մերձաւոր Արևելքէն կը շարունակեն հասնիլ լուրեր, որոնք խոր մտահոգութիւն կը յառաջացնեն: Աղետալի բռնութեան և աւերումներու դէպքերուն, պառակտուած ատելութեան և վախի մթնոլորտին կ՛աւելնայ նաև այն վախը, որ հակամարտութիւնը կարող է տարածուիլ, եւ տարածաշրջանի այլ երկիրներ, որոնց շարքին սիրելի Լիբանանը, կարող են կրկին մխրճուիլ անկայունութեան մէջ։

«Մեր խոնարհ աղօթքը բարձրացնենք Տիրոջ, որպէսզի դադրին ռումբերուն շառաչիւնները, լռեն զէնքերը և բացուի երկխօսութեան դաշտ մը, ուր կարելի ըլլայ լսել ժողովուրդներուն ձայնը» ըսաւ ապա Քահանայապետը իր այս աղերսը վստահելով Մարիամին, Խաղաղութեան Թագուհիին, որպէսզի «Ան բարեխօսէ անոնց համար, որոնք կը տառապին պատերազմի պատճառաւ, և առաջնորդէ սրտերը խաղաղութեան և հաշտութեան ուղիներով»:

Կանանց միջազգային օրը

Նորին Սրբութիւնը յիշեց ապա 8- մարտին յիշատակուող Կանանց միջազգային օրը եւ կոչ ուղղեց նորոգելու յանձնառումը` որ «քրիստոնեաներուս համար հիմնուած է Աւետարանին վրայ, մարդու և կնոջ հաւասար արժանապատուութիւնը ճանաչելու համար»:

«Ցաւօք, շատ կիներ, մանուկ հասակէն, տակաւին ենթարկուած են խտրականութեան և բռնութեան, անոնց է որ յատուկ կերպով կ՛ուղղեմ իմ զօրակցութիւնս եւ աղօթքս» ըսաւ Լեւոն ԺԴ. ապա ողջունեց հրապարակին վրայ գտնուող ուխտաւորներու զանազան խումբերը բոլորին մաղթելով բարի կիրակի։