Քահանայապետը կը մասնակցի «Աղքատներուն հետ Համերգին»

Ռոպէր Աթթարեան - Վատիկան

Շաբաթ` 6 դեկտեմբերի յետմիջօրէի ժամը 5,30-ին, Վատիկանի Պօղոս Զ անուան դահլիճին մէջ Նորին Սրբութիւն Լեւոն ԺԴ. Պապին ներկայութեամբ կը կայանայ «Համերգ աղքատներու հետ» ձեռնարկի վեցերորդ փուլը: Անվճար` միջոցառում որ կը միացնէ գեղարուեստական​​ գեղեցկութիւնն ու զօրակցութիւնը հանդիպման և բաժնեկցութեան հոգիով:

Քահանայապետին համերգի մը առաջին մասնակցութիւնը 

Իր Քահանայապետութեան սկզբէն ի վեր այս առաջին անգամն է` որ Լևոն ԺԴ-ը կը մասնակցի հանրային համերգի մը` Պօղոս Զ դահլիճին մէջ, և միշտ առաջին անգամն է որ Քահանայապետ մը կը մասնակցի «Համերգ աղքատներու հետ» ձեռնարկին, անոր տալով արտակարգ կարեւորութեամբ խորհրդանշական և հովուական արժէք։

Համերգի աստղ Մայքըլ Պուպլէ

Այսօրուայ համերգին աստղն է աշխարհահռչակ երգիչ Մայքըլ Պուպլէն, որ ելոյթ կ՛ունենայ իր նուագախումբի մէկ մասին հետ, Գերապ. Մարքօ Ֆրիզինայի, «Նովա օբերա» նուագախումբի և Հռոմի թեմի երգչախումբի հետ միասին: Երեկոն կը վարէ դերասանուհի, հաղորդավարուհի և երգչուհի Սերենա Աութիերին, որ սիրուած ձայն է իտալական գեղարուեստական​​​​ ասպարէզէն ներս:

Նախաձեռնութիւնը հովանաւորուած է Հռոմի թեմի, Վատիկան քաղաք-պետութեան նահանգապետութեան և Առաքելական բարեգործութեան Վերատեսչութեան գրասենեակի կողմէ։ Համերգի երաժշտական ​​ծրագիրը կը ներկայացուի որպէս Սուրբ Ծննդեան հեքիաթ՝ միահիւսելով ծիսական աւանդոյթը ժամանակակից մեծ երգացանկի հետ։

Սրբազան Պապին ժամանումին Հռոմի թեմի երգչախումբը և «Նովա օբերա» նուագախումբը Քահանայապետը կ՛ ողջունեն «Tu sei Pietro» երգով՝ ստեղծելով հանդիսաւոր մթնոլորտ մը։

Մայքըլ Պուպլէն իր խոր երախտագիտութիւնը յայտնեց «Նովա օբերա» հիմնադրամին իրեն ուղղած հրաւէրին համար՝ յայտարարելով, որ պատիւ է իրեն համար հանդէս գալ Սրբազան Պապին առջեւ, Հռոմի թեմի նուագախումբի և երգչախումբի հետ միասին, և անհամբեր կը սպասէ այս յատուկ պահը կիսելու յատուկ հանդիսատեսներու հետ։ Ձեռնարկ` որ կը միացնէ երաժշտութեան հոգևոր ուժը աղքատներու նկատմամբ գործնական նուիրուածութեան հետ՝ գեղեցկութիւնը վերածելով եղբայրութեան և համատեղ յոյսի լեզուի։ Պուպլեն նաև նշած է, որ իրեն «պատիւ և ոգևորութիւն կը պատճառէ քրիստոնէութեան սրտին մէջ նման յատուկ պահ կիսելը՝ երգելով աղքատներու համար և անոնց հետ»։

Երեք հազար աղքատներու մասնակցութիւնը 

Արդարեւ համերգին ներկայ գունուող ութը հազար հանդիսատեսներէն երեք հազարը կազմուած է աղքատներէ, որոնք հիւրը պիտի հանդիսանան Բարեգործութեան Վերատեսչութեան։ 2015-ին Ֆրանչիսկոս Պապին կամքով ծնունդ առած այս ձեռնարկը այս տարի ներառուած է Յոյսի Յոբելենական տարուան ոլորտէն ներս եւ կ՛ուզէ նորոգել ձեռնարկին խոր իմաստը` այն է երաժշտութիւնը վերափոխել հանդիպումի վայրի, ուր իւրաքանչիւր խազ կը դառնայ բաժնեկցուած աղօթք եւ իւրաքանչիւր ձայն մարդկայնութեան, մօտիկութեան եւ վերջիններու նկատմամբ յոյսի նշան։