Քահանայապետին կոչը Երիտասարդներուն՝ ստեղծելու արդար տնտեսութիւն մը

Վազգէն Աբարդեան - Վատիկան

Լեւոն ԺԴ. Պապ պատգամ մը ուղղեց «The Economy of Francesco-Ֆրանչիսկոսի Տնտեսութիւնը» հանդիպումի մասնակիցներուն։ Երիտասարդներուն ուղղած պատգամին մէջ Քահանայապետը շեշտեց անոնց դերին կարեւորութիւնը ապագան ձեւաւորելու մէջ, համաշխարհային հանդիպումի եւ «The Economy of Francesco»-ի ճամբորդութեան միջոցաւ, որ կը յարմարեցնէ Աւետարանը տնտեսութեան հետ, ներշնչուած Սուրբ Ֆրանչիսկոս Ասիզացիէն եւ Ֆրանչիսկոս Պապէն։

Նորին Սրբութիւնը ընդգծեց, որ Աւետարանը կը փոխակերպէ մարդկային աշխատանքը, աշխարհ բերելով փոփոխութիւններ եւ առատ կեանք, եւ թէ ինչպէս երիտասարդները արդէն իսկ հանդիպած են մարդոց եւ սկսած են այս տեսլականով ներշնչուած ծրագիրներ։ Ան յիշեց Ֆրանչիսկոս Պապին մահը Զատիկի օրը, որպէս յոյսի եւ հոգեւոր ժառանգութեան շարունակականութեան նշան, հրաւիրելով երիտասարդները՝ պահելու եւ սնելու այս յոյսը։

Նորին Սրբութիւնը հրաւիրեց երիտասարդները ստեղծելու տնտեսութիւն ընելու նոր եղանակ մը, որ կը նպաստէ նիւթական եւ հոգեւոր բարօրութեան, եւ ըլլալու քաջ իրենց հաւատքի եւ ընկերային նուիրումի ճամբուն վրայ, դուրս գալով անտարբերութենէն եւ յառաջ տանելով ընդհանուր բարիքը։ «Restarting the Economy» խորագիրը կը յիշեցնէ վերսկսելու գաղափարը ոչ միայն որպէս արտադրութիւն, այլեւ որպէս կեանքի եւ արժանապատուութեան վերադարձ մարդոց եւ համայնքներուն, կոտրելով անարդարութիւնները եւ բուժելով աշխարհի վէրքերը, բացայայտելով նոր ուղիներ։

Անդրադառնալով «նոր բանին», յիշեց Ֆրանչիսկոս Պապին հրաւէրը նայելու ծայրամասերուն եւ մեկուսացուածներուն, որպէս խորհրդանշական բորոտներ, մարդկային եւ արդար տնտեսութիւն մը յառաջ տանելու համար, համաձայն փոքրութեան սկզբունքին. իրական փոփոխութիւնը կը կատարուի ամենաթոյլերէն ու աղքատներէն, ոչ թէ զօրութենէն։ Երիտասարդները կը քաջալերուին բացայայտելու անհաւասարութիւնները եւ նուիրուելու Աստուծոյ երազներուն, խաղաղութեան աշխարհ մը կառուցելու համար, քանդելով պատերն ու կանխակալութիւնները։

Վերջապէս, Նորին Սրբութիւնը հրաւիրեց սնելու Սուրբ Գիրքերով, որպէս ուղեցոյց եւ ներշնչում աշխատանքի եւ ընկերային նուիրումի մէջ, ճանչնալով աստուածային տնտեսութիւնը եւ հետեւելով հաւատքի վկաներուն։ Քահանայապետը պատգամը աւարտեց քաջալերով եւ փոխանցելով իր առաքելական օրհնութիւնը։