21 սեպտեմբերին Քահանայապետը պատարագ կը մատուցէ Վատիկանի Սրբուհի Աննա ժողովրդապետութեան մէջ։
Ռոպէր Աթթարեան - Վատիկան
Կիրակի` 21 սեպտեմբերին Լեւոն ԺԴ Սրբազան Պապը առաւօտեան ժամը տասին պատարագ պիտի մատուցէ Վատիկանի Սրբուհի Աննա ժողովրդապետութեան Եկեղեցւոյ մէջ։ Լուրը յայտարարեց Սուրբ Աթոռի մամլոյ գրասենեակը։
Փրեվոսթ Քահանայապետը անցեալ տարուայ 26 Յուլիսին եւս, որպէս Կարդինալ, պատարագ մատուցած էր այնտեղ` Սուրբ Կոյս Մարիամի ծնողաց` Սուրբ Յովակիմ եւ Սրբուհի Աննայի ծիսական տօնին առիթով։
Ը. դարու Եկեղեցի
Պատմական Եկեղեցին` որ կառուցուած է Ը դարուն, կեդրոնը եղած է Պապական ձիաստաններով զբաղողներու եղբայրութեան, որոնց հովանաւորն էր Սրբուհի Աննան։
Լատերանեան դաշինքէն ետքը` 30 Մայիս 1929-ին, Պիոս ԺԱ Քահանայապետը «Ex Lateranensi pacto» առաքելական սահմանադրութեամբ, զայն վերածեց ժողովրդապետութեան անոր հովուական հոգատարութիւնը յանձնելով Սուրբ Օգոստինոսի կրօնաւորներուն։ Անոր առաջին ժողովրդապետը եղաւ Հայր Ակոսթինօ Ռուելլին, որ նշանակուեցաւ 1929-ի եօթը օգոստոսին։ Իսկ ներկայ ժողովրդապետն է Հայր Մարիօ Միլլարտին։
Եկեղեցին ու քահանայապետերը
Սրբուհի Աննա ժողովրդապետութիւնը այցելեցին տարբեր քահանայապետներ, սկսեալ Պիոս ԺԱ, որ ներկայ գտնուեցաւ Եկեղեցւոյ երգեհոնի բացման արարողութեան 7 փետրուար 1931-ին։ Ապա Յովհաննէս ԻԳ-ը, որ ժողովրդապետութիւնը այցելեց 1961 թուականի 20 Յունուարին։ հուսկ Պօղոս Զ-ը այնտեղ նշեց իր քահանայութեան 50-ամեակը. 29 մայիս 1970 -ին։ Սուրբ Յովհաննէս Պօղոս Բ-ը զայն անուանեց «իմ ծխական համայնքը» 1978 թուականի դեկտեմբերի 10-ին արտասանած իր քարոզին մէջ։ Պենետիկտոս ԺԶ.ը ապա այնտեղ նախագահեց արարողութիւն մը 2006 փետրուարի հինգին, իսկ Ֆրանչիսկոս Պապը զայն ընտրեց իր առաջին հրապարակային պատարագի համար `2013 թուականի մարտ 17-ին։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
