Լեւոն ԺԴ. պատգամը Հռոմի արհեստական բանականութեան երկրորդ ամենամեայ համաժողովին
Ռոպէր Աթթարեան - Վատիկան
Ուրբաթ` 20 Յունիս 2025-ին Լեւոն ԺԴ. Սրբազան Քահանայապետը պատգամ մը յղեց Հռոմի արհեստական բանականութեան երկրորդ ամենամեայ համաժողովի մասնակիցներուն, անոնց փոխանցելով իր բարեմաղթանքն ու աղօթքը։
ԱԲ մասին շարունակական երկխօսութեան անհրաժեշտութիւն
«Ձեր այստեղ ներկայութիւնը վկայութիւնն է Արհեստական Բանականութեան ներքին բարոյական չափանիշի և անոր պատասխանատու կառավարման վերաբերեալ լուրջ մտորումներու և շարունակական երկխօսութեան անհրաժեշտութեան», գրած է Քահանայապետը պատգամին մէջ ուրախութիւն արտայայտելով, որ Համաժողովը գումարուած է Առաքելական Պալատէն ներս, որ «յստակ նշան է Եկեղեցւոյ փափաքին, մասնակցելու այդ քննարկումներուն, որոնք ուղղակիօրէն կը դպչին մարդկային ընտանիքի ներկային եւ ապագային» նշած է Ան, ակնարկելով ԱԲ մարդկութեան ի նպաստ օգտակարութեան բայց նաեւ այն հարցականներուն` որոնք ի յայտ կու գան Արհեստական բանականութեան արագ զարգացումէն, որ «խոր հարցեր կը յառաջացնէ այս արհեստագիտութեան ճիշտ օգտագործման վերաբերեալ»։
Աբ նախ եւ առաջ գործիք է եւ պէտք է զայն օգտագործել ի նպաստ մարդկութեան բարօրութեան
«ԱԲ թէեւ մարդկային հանճարի բացառիկ պտուղն է, ան նախ եւ առաջ գործիք է» նշած է Լեւոն ԺԴ. յիշելով իրեն նախորդ Ֆրանչիսկոս Պապին խօսքերը ու ակնարկելով զայն օգտագործելու բարոյական արժէքին. «ԱԲ օգտագործուեցաւ խթանելու համար հաւասարութիւնը, բայց կարելի է նաեւ որ ան շահագործուի եսասիրական նպատակներու կամ հակամարտութիւններ հրահրելու» դիտել տուած է Նորին Սրբութիւնը ընդգծելով «Եկեղեցւոյ պատրաստակամութիւնը» այս ոլորտէն ներս սատարելու «անդորր եւ տեղեկացուած երկխօսութեան» ի նպաստ «մարդկային եւ ընկերութեան համապարփակ զարգացումին»։
Զգոյշ ըլլալ «մարդկայինի» իմաստի կորուստի վտանգէն
«Այս մէկը կ՛ ենթադրէ մարդկանց նիւթական, մտաւոր և հոգևոր բարեկեցութեան մասին հոգատարութիւն, իւրաքանչիւր մարդու անձեռնմխելի արժանապատուութեան պաշտպանութիւն և ժողովուրդներու մշակութային և հոգևոր բազմազանութեան յարգումը» հաստատած է հուսկ Լեւոն ԺԴ. որ ապա զգուշացուցած է «մարդկայինի» իմաստի կորուստի վտանգէն, որ ապրուած է մեր ընկերութիւններուն մէջ, յատկապէս երիտասարդներու միջեւ, հրաւիրելով ուշադիր ըլլալ եւ չի շփոթել «տուեալներուն հասանելիութիւնը իրական բանականութեան հետ, ինչը կ՛ ենթադրէ ճշմարտութեան և բարութեան նկատմամբ բացուածք» շեշտած է Ան ։
«Իսկական իմաստութիւնը կը հայի կեանքի իմաստին, եւ ոչ թէ տուեալներու քանակի»
«Իսկական իմաստութիւնը կը հայի կեանքի իմաստին, եւ ոչ թէ տուեալներու քանակի» գրած է Լեւոն ԺԴ. պատգամին մէջ, որ ապա զայն աւարտած է մաղթելով, որ համաժողովի աշխատանքները նպաստեն արհեստական բանականութեան մշակոյթի մը ստեղծման, որ հիմնուած ըլլայ զօրակցութեան, մարդկայնութեան և իւրաքանչիւր մարդու արժանապատուութեան նկատմամբ յարգանքի վրայ, ապա բոլորին վրայ հայցած է «իմաստութեան ուրախութեան եւ խաղաղութեան աստուածային օրհնութիւնները»։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
