Քահանայապետը վերաբացաւ Առաքելական Պալատի բնակարանը, հանելով Թափուր Աթոռի կնիքները

Ռոպէր Աթթարեան - Վատիկան

Կիրակի` 11 Մայիսի կէսօրին Սուրբ Պետրոս Պազիլիքայի կեդրոնական պատշգամէն արտասանած Ուրախ Լեր Թագուհի Մարեմեան աղօթքի աւարտին Լեւոն ԺԴ. Քահանայապետը բացումը կատարեց Առաքելական Պալատին դռներուն որոնք կնիքով փակուած  էին Թափուր Աթոռի սկիզբը`  21 ապրիլի յետմիջօրէին, Ֆրանչիսկոս Պապին մահէն ետքը, ինչպէս նախատեսուած է «Universi Dominici Gregis» առաքելական սահմանադրութեան մէջ։ 

Բացումը կատարուեցաւ ի ներկայութեան Հռոմի Սուրբ Եկեղեցւոյ Քամերլենկօ` Կարդինալ Քեվին Ֆարրելի, Պետական Քարտուղար` Կարդինալ Փիեթրօ Փարոլինի, Պետքարտուղարութեան ընդհանուր գործերու տեղակալ Գերապ. Էտկար Փենիա Փառայի, Պետութիւններու ու միջազգային կազմակերպութիւններու հետ յարաբերութիւններու քարտուղար Գերապ. Փոլ Ռիչըրտ Կալլակէրի ու Քահանայապետական Տան Հոգաբարձութեան տեղակալ Գերապ. Լէոնարտօ Սափիենցայի։