Քահանայապետը հանգիստ գիշեր մը անցուցած է
Ռոպէր Աթթարեան - Վատիկան
Այսօր` 26 Փետրուարի առաւօտեան Քահանայապետի առողջութեան մասին վերջին թարմացումով Սուրբ Աթոռի մամլոյ գրասենեակը տեղեկացուց որ Սրբազան Քահանայապետը հանգիստ գիշեր մը անցուցած է թէեւ երէկ գիշեր հրատարակուած հաղորդագրութեամբ մը նշուած էր թէ Նորին Սրբութեան վիճակը կը մնայ բարդ բայց աներեր։
Այս 13րդ օրն է որ Սրբազան Պապը կը գտնուի Ճեմելլի հիւանդանոց, հիւանդանոցի 10րդ յարկին վրայ իրեն վերապահուած յարկաբաժնին մէջ ուր կը վայելէ բժիշկներուն խնամքը ի տես յայտնուած երկկողմանի թոքաբորբին։
Երեկ երեկոյեան հրատարակուած հաղորդագրութեան մէջ նշուած էր ի միջի այլոց թէ Ան սուր շնչառական դրուագներ չէը ունեցած ու թէ «հեմոդինամիկ» չափանիշերը կը շարունակեն ըլլալ կայուն: Երեկոյեան Ան ենթարկուեցաւ նաեւ ծրագրուած տոմոկրաֆիայի որուն արդիւնքները ի յայտ կու գան այսօր։ Հաղորդագրութեան աւարտին նշուած էր նաեւ` որ «Կանխատեսումը կը մնայ զգուշաւոր վերապահութեամբ»։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
