Գերերջանիկ Շեվչուք Արքեպիսկոպոսը. «Ազատութիւնը բնաւ ինքնաբերաբար տրուած բան մը չէ, աղօթեցէ՛ք Ուքրանիոյ խաղաղութեան համար»
Վատիկան Նիուզ - Հայկական բաժանմունք
Ուքրանիոյ անկախութեան 35-ամեակին առթիւ, Ուքրանիոյ Յոյն-Կաթողիկէ Եկեղեցւոյ Արքեպիսկոպոսապետ Սվիաթոսլաւ Շեվչուք միջազգային համայնքին նոր կոչ մը ուղղած է՝ աղօթելու խաղաղութեան համար եւ աջակցութիւնն ու զօրակցութիւնը չզլանալու ուքրանացի ժողովուրդին:
Տեսախցիկներով օժտուած համակարգերու կիրառումը ծանր կը դարձնէ քաղաքացիական անձերու դէմ իրականացուող յարձակումներուն բարոյական խնդիրը
Վատիկանի լրատուամիջոցներուն տուած հարցազրոյցին ընթացքին, Շեվչուք պատմած է Քիեւի մէջ տիրող ողբերգական իրավիճակին մասին, ուր ինք եւ բազմաթիւ այլ քաղաքացիներ ստիպուած են գիշերները անցընել ապաստարաններու մէջ՝ ռուսական շարունակական յարձակումներուն պատճառով: Արքեպիսկոպոսապետին փոխանցած տուեալներով՝ 2026 Յուլիս ամիսը եղած է ամենաարիւնալին 2022 Մարտէն ի վեր, որուն ընթացքին սպաննուած է 437 քաղաքացիական անձ եւ վիրաւորուած՝ 2.610-ը:
Գերապ, Շեվչուք նաեւ ընդգծած է հակամարտութեան աճող տեխնոլոգիական չափանիշը, ուր կը գործածուին հետզհետէ աւելի արդիական անօդաչու սարքեր եւ հրթիռներ: Ըստ Անոր՝ տեսախցիկներով օժտուած համակարգերու կիրառումը աւելի ծանր կը դարձնէ քաղաքացիական անձերու դէմ իրականացուող յարձակումներուն բարոյական խնդիրը:
Ազատութիւնը միայն պարտադրանքներու բացակայութիւն չէ
Անկախութեան տարեդարձը ուքրանացիներուն համար առիթ մըն է խորհրդածելու ազատութեան արժէքին մասին, որ ձեռք բերուած է խորհրդային ամբողջատիրութեան աւարտէն ետք: Սակայն Շեվչուքի համար ազատութիւնը միայն պարտադրանքներու բացակայութիւն չէ. այլ պատասխանատուութիւն է, բարին ընտրելու եւ մարդկային արժանապատուութիւնը պաշտպանելու կարողութիւն:
Անոր պատգամը աշխարհին յստակ է. «Մի՛ յոգնիք ազատ ըլլալէ»: Դէմ յանդիման հեղինակապաշտութեան աճին եւ ժողովրդավարական արժէքներու ճգնաժամին, արքեպիսկոպոսապետին համաձայն՝ իւրաքանչիւր անհատ պէտք է ստանձնէ իր հասարակութեան ապագայի պատասխանատուութիւնը:
Կոչ աղօթելու եւ մօտիկ ըլլալու Ուքրանիոյ
Ի վերջոյ, Շեվչուք կոչ կ’ուղղէ Տիեզերական Եկեղեցւոյ եւ բարեացակամ բոլոր մարդոց՝ միանալու Ուքրանիոյ աղօթքով: Արդարեւ Օգոստոս 24-ին, Քիեւի Սուրբ Սոֆիայի տաճարին մէջ տարբեր Եկեղեցիներու ներկայացուցիչներ կը համախմբուին աղօթելու խաղաղութեան համար:
«Մենք ձեր զօրակցութեան կարիքն ունինք», ըսած է ան՝ աղօթքն ու մարդասիրական գործունէութիւնը նկատելով ուքրանացի ժողովուրդին մօտենալու եւ մօտ գտնուելու իրական ձեւ մը:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
