Պատրիարք Մինասեան . «Լիբանանեան բանակը կը մնայ ազգային միասնականութեան պատուարը»
Ռոպէր Աթթարեան - Վատիկան
Օգոստոս 1-ին նշուող Լիբանանեան Բանակի Օրուան առթիւ, Տանն Կիլիկիոյ Կաթողիկէ Հայոց Ամենապատիւ եւ Գերեջանիկ Ռաֆայէլ Պետրոս ԻԱ. Մինասեան Կաթողիկոս-Պատրիարքը զօրակցութեան եւ երախտագիտութեան պատգամ մը ուղղեց Զինեալ Ուժերուն՝ զանոնք կոչելով «երկիրը միաւորող ազգային հաստատութիւնը» եւ անհրաժեշտ երաշխիք մը անոր միասնականութեան, ինքնիշխանութեան ու կայունութեան համար:
Պատրիարքը ընդգծեց, որ մարտահրաւէրներով եւ դժուարութիւններով լեցուն այս պահուն, լիբանանեան բանակը կը հանդիսանայ ազգային ապահովութեան գլխաւոր յենարանը, կոչ ընելով բոլոր քաղաքացիներուն եւ հաստատութիւններուն՝ զօրավիգ կանգնելու անոր դերին եւ ամրապնդելու անոր կարողութիւնները:
«Բանակին ուժը Լիբանանի ուժն է», հաստատեց ան՝ շեշտելով, որ Զինեալ Ուժերու յաջողութիւնը կը համընկնի ամբողջ երկրի յաջողութեան հետ:
Իր պատգամին մէջ, Ամենապատիւ Հոգեւոր Տէրը նաեւ յարգանքի տուրք մատոյց այն զինուորականներուն, որոնք զոհողութեամբ եւ նուիրումով կարեւոր էջեր գրած են Լիբանանի պատմութեան մէջ, մասնաւորապէս յիշելով նահատակները, որոնց օրինակը կը շարունակէ վկայել հայրենիքին ծառայելու արժէքը:
Պատրիարքը եզրափակեց աղօթքով մը, որպէսզի Աստուած պահպանէ Լիբանանեան Բանակի հրամանատարութիւնը, սպաները եւ բոլոր զինուորները՝ անոնց շնորհելով ուժ, իմաստութիւն եւ տոկունութիւն՝ ազգի, խաղաղութեան եւ համակեցութեան ծառայող իրենց առաքելութեան մէջ:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
