Միջերկրականի Երիտասարդները. Խաղաղութեան եւ կայունութեան եղբայրացումներու մեկնարկը
Ռոպէր Աթթարեան - Վատիկան
Ներշնչուելով Սուրբ Ֆրանչիսկոսէն եւ Ճորճիօ Լա Փիրայէն՝ Միջերկրականի Եկեղեցիներու եւ Պատրիարքութիւններու 30 տարեկանէն վար 34 պատուիրակներ հաւաքուած են Ֆիէզոլէի մէջ՝ Միջերկրականի Երիտասարդաց Խորհուրդի կեդրոնական փուլին համար, որ կազմակերպուած է Իտալական Եկեղեցիին կողմէ եւ կը համադրուի «Մարէ Նոսթրում» Ցանցին կողմէ:
Եղբայրացումներու արձանագրութիւն մը
Այս տարուան գլխաւոր նորութիւնն է համաձայնութեան արձանագրութեան մը ճշդումը՝ դիւրացնելու եւ կրկնելու համար Միջերկրականի տարբեր ափերու թեմերու, ծուխերու եւ միութիւններու միջեւ եղբայրացումները՝ երկխօսութիւնը վերածելով գործնական քայլերու եւ ծրագիրներու:
Ուխտագնացութիւն դէպի Ասսիզի
Երկուշաբթի, Յուլիս 20-ին տեղի ունեցաւ ուխտագնացութիւն մը դէպի Ասսիզի՝ Սուրբ Ֆրանչիսկոսի ծննդեան 800-ամեակին առթիւ, զօրացնելու համար խաղաղութեան ուղիին հոգեւոր եւ եկեղեցական չափանիշը:
Հինգշաբթի, Յուլիս 23-ին (Ֆլորանս) նախատեսուած է Հանրային նիստ Թոսքանայի Շրջանային Խորհուրդի նստավայրին մէջ՝ «Խաղաղութիւն Լիբանանի մէջ, խաղաղութիւն Միջերկրականի մէջ» թեմայով, երիտասարդներու անմիջական վկայութիւններով եւ երեւելի դէմքերու մասնակցութեամբ:
Ուրբաթ, Յուլիս 24-ը կը հանդիսանայ հոգեւոր օր մը Սիլոէի վանական համայնքին մօտ իսկ Շաբաթ, Յուլիս 25-ին կը կատարուի աշխատանքներու փակում «Վիլլաճիօ Լա Վելա»ի մէջ՝ արդիւնքներու ներկայացումով եւ դէպի 2027-ի հանդիպումը տանող ուղիի ճշդումով:
Առանցքային յայտարարութիւն
Ինչպէս ընդգծեց Կապրիէլէ Փեքիոլի («Ճորճիօ Լա Փիրա» Երիտասարդաց Հիմնարկ), նախաձեռնութիւնը կը շարունակուի Սրբազան Քահանայապետին հետ հաղորդութեան մէջ եւ 2022-ին Ֆլորանսի մէջ եպիսկոպոսներու ստանձնած յանձնառութեան շարունակականութեան մէջ՝ կեդրոնանալով նոր սերունդներու ընկերային եւ հոգեւոր կազմաւորման վրայ, կառուցելու համար իրական «խաղաղութեան կամուրջներ»՝ նոյնիսկ յաղթահարելով ընթացիկ պատերազմներու եւ վիզաներու ստացման դժուարութիւններու պէս բարդ խոչընդոտներ:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
