Ռաֆայէլ Պետրոս ԻԱ. Մինասեանի հայրապետական այցելութեան Սուրբ Պատարագը Պաղտատի Նարեկի Տիրամօր Տաճարին մէջ
Հայր Մովսէս Վրդ. Տօնանեան
Կիրակի 31 Մայիս 2026-ի երեկոյեան ժամը 6:00-ին, Ամենապատիւ և Գերերջանիկ Տ. Ռաֆայէլ Պետրոս ԻԱ. Մինասեան, Տանն Կիլիկիոյ Կաթողիկէ Հայոց Կաթողիկոս Պատրիարքը Սուրբ Պատարագ մատուցեց Պաղտատի Նարեկի Տիրամօր Տաճարին մէջ, առընթեր Արհի. Գերապայծառ Ներսէս Արք. Զապարեանի եւ Գերյարգելի Հ. Մեսրոպ Ծ.Վ. Թօփալեանի:Հանդիսապետ Հայրապետին առընթերագոյն էին՝ Գեր. Հ. Մովսէս Վրդ. Տօնանեանը և Գեր. Հ. Արամ Վրդ. Աբրահամեանը:
Պատարագին հրաւիրուած էին Իրաքի Հայ Առաքելական Եկեղեցւոյ Առաջնորդ՝ Գերշ. Տ. Օշական Եպս. Կիւլկիւլեան եւ իրեն ընկերակցող Արժանապատիւ քահանայ հայրերը, ինչպէս նաեւ Պաղտատի Կաթողիկէ Եկեղեցիներու հոգեւոր հայրերը:
Ներկայ էին նաեւ Հայաստանի Հանրապետութեան դեսպանն՝ Տիար Ռուբէն Սողոյեանը, պատուոյ հիւպատոսը եւ մեծ թիւով հաւատացեալներ:
«Հրաշափառ» շարականի երգեցողութեամբ Ամենապատիւ Հոգեւոր Տէրը դիմաւորուեցաւ ժողովուրդի զաւակներուն կողմէ, ապա հոգեւորական դասը բարձրացաւ Ս. Խորան և տեղի ունեցաւ Պատարագի ճաշու մասը. ժամամուտի և Մեծացուսցէ շարականի երգեցողութիւնը կատարեցին տեղւոյն երգչախումբը բարձր կատարողութեամբ:
Քարոզի պահուն, Ամենապատիւ Հոգեւոր Տէրը իր պատգամը տուաւ, ըսելով. «Գոհութիւն և փառք կու տամ ամենաբարին Աստուծոյ, որ առիթը ընծայեց ինծի Պաղտատի Նարեկի Տիրամօր տաճարին մէջ Պատարագ մատուցելու և իմ պատգամը ուղղելու ներկայ հաւատացեալ հայորդիներուն և հոգեւորական դասուն: Այս իմ կարճատեւ այցելութիւնը Պաղտատ և իմ առաջին Պատարագը ուխտադրութիւն կը համարեմ, որովհետեւ զուգադիպեցաւ Մայիս ամսուայ աւարտին, որ Տիեզերաց Թագուհին մեծարելու յատուկ ժամանակաշրջանն է»:
Այնուհետեւ ամէնքը միաբերան «Հաւատամքը» արտասանեցին, և Պատարագի կանոնական աղօթքները և երգեցողութիւնը հերթաբար կատարուեցան մինչեւ Ս. Հաղորդութիւն: Աւարտին, Աստուածամօր պատկերով թափօր կազմուեցաւ. երգչախումբը շարականներ եւ հոգեւոր տաղեր կատարեց։
Հոգեպարար արարողութեան վերջաւորութեան՝ Ամենապատիւ Հոգեւոր Տէրը յուշանուէրներ շնորհեց առաջին հերթին Արհի. Գերապայծառ Հօր պանակեայ մը, Հ. Մովսէսին Կարդինալ Աղաճանեանի յուշամետալը և խորանի սպասաւորներուն՝ վարդարաններ: Ապա եկեղեցական դասը և ժողովուրդը «Կեցցո՛ զորդի» շարականի երգակցութեամբ՝ ուղղուեցան Եկեղեցւոյ «Աբիկեան» սրահը, ուր տեղի ունեցաւ աջահամբոյր և յաւուր պատշաճի հիւրընկալութիւն: Որմէ ետք, եկեղեցւոյ Տիկնաց միութիւնը ի պատիւ Հոգեւոր Տիրոջ, հիւրերուն և ժողովուրդին պաշտօնական ճաշկերոյթ մը սարքած էին:
Այս առթիւ, Պաղտատի Հ. Կ. Թեմի Առաջնորդ՝ Գերպծ. Հ. Ներսէս Արք. Զապարեանը իր սրտի խօսքը ուղղեց Պատրիարք Հօր, որոմէ ետք խօսք առաւ Տեար Ժոզէֆ Պանտալի կիսասարկաւագը՝ բարի գալուստ մաղթելով Հոգեւոր Տիրոջ և ներկայացուց երեկոյթի գեղարուեստական յայտագիրը: Այնուհետեւ, երգչախումբը երգեց Հայրապետական մաղթանքը՝ «Ամէն հայի սրտից բխած» և հերթաբար հայերէն և արաբերէն սիրուած երգերու համերգ մը ընթացք առաւ: Սրտի խօսք արտասանեցին նաեւ եկեղեցւոյ Տիկնանց Միութեան անդամուհիներ՝ տիկին Նայիրի (հայերէն) և տիկին Զիգրա (արաբերէն):
Դիւթիչ էին յատկապէս «Կիլիկիա», «Երեւան Էրէբունի», «Ազգ փառապանծ» և Սայաթ Նովայի մեներգները։ Հայերէն ոտանաւորներ արտասանեցին խորանի սպասաւորները և համայնքի սիրասուն փոքրիկները: Ճաշկերոյթի աւարտին, Արհի. Հ. Ներսէս Արք Զապարեանը Պաղտատի Հ. Կ. եկեղեցիները ներկայացնող իւղապատկեր մը նուիրեց Հոգեւոր Տիրոջ, ինչպէս նաեւ յուշանուէրներ շնորհեց հիւր վարդապետներուն:
Հուսկ, Պաղտատի Հայ Կաթողիկէ Եկեղեցւոյ Առաջնորդութիւնը, Տանն Կիլիկիոյ Կաթողիկէ Հայոց Պատրիարք Հօր, Մայիսեան ամսուն աւարտին կատարած հովուապետական այցելութեան առթիւ, իր խորին շնորհակալութիւնը յայտնեց, Հոգեւոր Տէրն ալ իր կարգին շնորհակալութիւն յայտնեց ջերմ ընդունելութեան համար: Ան յատուկ շնորհակալութիւն յայտնեց Թեմիս Առաջնորդ՝ Արհի. Հ. Ներսէս Արք. Զապարեանին, ինչպէս նաեւ եկեղեցական դասուն, թաղական խորհուրդի խնամակալութեան և Տիկնանց միութեան, և անոնց կատարած աշխատանքը գնահատելով՝ իր հայրական օրհնութիւնը փոխանցեց:
Կեցցէ և կեցցէ յաւիտեան Տանն Կիլիկիոյ Կաթողիկէ Հայոց Գահակալը:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
