Վրաստան. Շիօ Գ. դարձաւ Ուղղափառ Եկեղեցւոյ նոր պատրիարք

Ռոպէր Աթթարեան - Վատիկան

Վրաց Ուղղափառ Եկեղեցին նոր հոգեւոր առաջնորդ մը ունի. Մայիս 11-ին, Թիֆլիսի Սուրբ Երրորդութիւն մայր տաճարին մէջ գումարուած Սինոդի նիստին, Շիօ մետրոպոլիտը ընտրուեցաւ Կաթողիկոս-Պատրիարք: Ան կը յաջորդէ Իլիա Բ.-ին, որ մահացած էր անցեալ Մարտ 17-ին՝ տասնամեակներ շարունակ գլխաւորելէ ետք վրաց եկեղեցին:

57 տարեկան Շիօ Գ.-ն (աւազանի անունով՝ Էլիզպար Թէյմուրազ Մուժիրի) ծնած է Թիֆլիս եւ արդէն իսկ կը վարէր պատրիարքական տեղապահի պաշտօնը:

Այս ընտրութեամբ ան կը ստանձնէ նաեւ Մցխեթա-Թիֆլիսի արքեպիսկոպոսի ու Աբխազիոյ եւ Պիչվինթայի մետրոպոլիտի տիտղոսները:

Քուէարկութեան մասնակցեցան շուրջ 1200 պատուիրակներ Վրաստանի տարբեր շրջաններէն, իսկ գահակալութեան արարողութիւնը տեղի ունեցաւ այսօր 12 Մայիսին՝ Մցխեթայի պատմական Սուէթիցխովելի մայր տաճարին մէջ:

Իր անդրանիկ խօսքին մէջ, նորընտիր պատրիարքը շեշտեց եկեղեցւոյ դերը որպէս «ազգի միաւորող ուժ» եւ վրացական հաւատքի, լեզուի ու աւանդութիւններու պահապան:

Շիօ Գ.-ն աստուածաբանական կրթութիւնը ստացած է Մոսկուայի մէջ, ինչպէս նաեւ աւարտած է Պետական երաժշտանոցի թաւջութակի (violoncello) բաժինը: Ան կուսակրօնութեան ուխտ ըրած է 1993-ին:

Վատիկանէն իր շնորհաւորանքները յղեց Քրիստոնեաներու միութեան խթանման Վերատեսչութեան Վերատեսուչ՝ Կարդինալ Քուրթ Քոխը, որ յոյս յայտնեց Կաթողիկէ եւ Վրաց Ուղղափառ եկեղեցիներու միջեւ զարգանայ եղբայրական երկխօսութիւնը։