Իտալիոյ Եպիսկոպոսաց դասը աղօթքի եւ ծոմապահութեան օր Հռչակեց ի սպաս խաղաղութեան

Վազգէն Աբարդեան - Վատիկան

Լռութեան, աղօթքի եւ սնունդէ կամաւոր հրաժարումի օր մը՝ հայցելու համար մեր ժամանակներու ամենանուրբ ու անհրաժեշտ պարգեւը՝ խաղաղութիւնը։ Այսօր՝ Ուրբաթ, 13 Մարտին, Իտալիոյ կաթողիկէ համայնքները, ընդառաջելով Իտալիոյ Եպիսկոպոսաց դասի հրաւէրին, միացան աղօթքի եւ ծոմապահութեան յատուկ օրուան՝ միջազգային լարուածութիւններու եւ անդադար հակամարտութիւններու մտահոգիչ մթնոլորտին մէջ։

Հաւաքական Հոգեւոր Յանձնառութիւն

Եպիսկոպոսներու այս նախաձեռնութիւնը նպատակ ունի ծխական համայնքները, կրօնաւորները եւ հաւատացեալները ներգրաւել միասնական հոգեւոր քայլի մը մէջ։ Ասիկա պարզապէս պաշտօնական արարողութիւն մը չէ, այլ պատերազմի ու բռնութեան արհաւիրքները ճաշակող ժողովուրդներու տառապանքին մասնակից դառնալու կենդանի նշան մը։

«Խաղաղութիւնը Աստուծոյ պարգեւն է, բայց նաեւ մարդոց վստահուած պատասխանատուութիւն», նշած են եպիսկոպոսները իրենց պատգամին մէջ։ Միանալով Լեւոն ԺԴ. Սրբազան Քահանայապետի կոչին՝ կասեցնելու բռնութեան ոլորապտոյտը «նախքան անդառնալի վիհ դառնալը», համայնքները հայցեցին Խաղաղութեան Թագաւորին գթութիւնը՝ փրկելու մարդկութիւնը նոր արցունքներէ ու կորուստներէ։

Շօշափելի օժանդակութիւն. Քարիթասի Առաքելութիւնը Կազայի եւ Յորդանանեան Ափի մէջ

Ծոմապահութիւնը՝ սնունդէն ու հանգիստէն հրաժարումը, կը խորհրդանշէ զօրակցութիւնը անոնց, որոնք կ՚ապրին ռումբերու տակ կամ ծայրայեղ չքաւորութեան մէջ։ Այս առթիւ հաւաքուած նուիրատուութիւնները պիտի ուղղուին Միջին Արեւելքի եւ աշխարհի այլ հակամարտ գօտիներու մարդասիրական ծրագիրներուն։

Յատկանշական է «Քարիթաս Ամպրոզիանա»-ի (Caritas Ambrosiana) դերը, որ սերտ գործակցութեամբ «Քարիթաս Երուսաղէմ»-ին հետ, կը շարունակէ օժանդակել Սուրբ Երկրի բնակչութեան։ Չնայած Իսրայէլեան բանակի կողմէ դրուած տեղաշարժի խիստ սահմանափակումներուն, Քարիթասը կը յաջողի.

Տաք կերակուր մատակարարել տարեցներուն

Ապահովել բժշկական անհրաժեշտ ծառայութիւններ Գազայի եւ Յորդանանեան Ափի (Ռամալլահ եւ Թայպէ) շրջաններուն մէջ։

Ֆինանսաւորել «Յոյս Գազայի համար» ծրագիրը, որուն նպատակն է հիմնել մայրական եւ մանկական նոր բուժարան մը։

Վերջին երկու տարիներուն «Քարիթաս Ամպրոզիանա»-ն արդէն իսկ շուրջ մէկ միլիոն եւրօ յատկացուցած է այս մարդասիրական առաքելութեան համար՝ հաստատելով, որ աղօթքը միշտ պէտք է զուգորդուի սիրոյ գործնական արտայայտութեամբ։